کوئٹہ(پاکستان پوائنٹ نیوز07۔دسمبر2017ء) چیف آف آرمی سٹاف جنرل قمر جاوید باجوہ نے آکھیا اے کہ مدرسیاں خلاف نہیں پر اسیں اوہناں دی اصل روح نوں گوا دتا اے،طیب اردوان وی مدرسے توں پڑھے پر اوہ اج ترکی دے صدر نیں، سانوں مدرسیاں وچ جدید تعلیم دین دی ضرورت اے۔ میڈیا رپورٹس مطابق آرمی چیف جنرل قمر جاوید باجوہ نے کوئٹہ وچ سیمینار نال خطاب کرد ے ہوئے آکھیا کہ پاکستان خاص طور اُتے بلوچستان چار مسئلیاں دی وجہ توں پچھانہ رہ گیا اے۔
پہلی وجہ تعلیم اے جو کسے وی ملک دی ترقی دی بنیاد ہوندی اے۔ میں مدرسیاں خلاف نہیں پر اسیں اوہناں دی اصل روح نوں گوا دتا اے۔ مدرسیاں بارے ایہ تاثر بن گیا اے کہ ایہ صرف اک فرقے دی تعلیم دیندے نیں ۔ اوہناں نے آکھیا کہ اک فرقے دی تعلیم حاصل کرن والے مدرسیاں دے پڑھیار کیہ بنن گے؟ سانوں مدرسیاں وچ جدید تعلیم دین دی ضرور ت اے۔ آرمی چیف نے آکھیا کہ طیب اردوان وی مدرسے توں پڑھے پر اوہ اج ترکی دے صدر نیں۔ اوہناں نے آکھیا کہ امن و امان دی صورتحال وی بلوچستان دی ترقی وچ رکاوٹ اے۔ اوہناں نے سیمینار نال خطاب وچ واضح کیتا کہ میں اک جمہوری بندہ واں۔ میرا پکا یقین اے کہ پاکستان مضبوط جمہوری عمل توں کامیاب ہوئے گا۔
