اسلام آباد(پاکستان پوائنٹ نیوز07۔دسمبر2017ء) قومی اسمبلی وچ امریکی صدر ٹرمپ دے جھیڑوے فیصلے خلاف سانجھی مذمتی قرارداد منظور کر لئی گئی اے۔ امریکی صدر نے مقبوضہ بیت المقدس نوں اسرائیلی راجدھانی منن دا اعلان کیتا اے۔ میڈیا رپورٹس مطابق امریکی صدر ڈونلڈ ٹرمپ ولوں فلسطین وچ مقبوضہ بیت المقدس نوں اسرائیلی راجدھانی منن دے جھیڑوے فیصلے خلاف دنیا بھر وچ احتجاجی وکھالے جاری نیں۔
پاکستان نے وی کُھل کے فلسطین دی حمایت جدکہ امریکی ایکشن خلاف اہم فیصلا کرن دا اعلان کیتا اے۔ ایس توں وکھ قومی اسمبلی وچ امریکی صدر خلاف سانجھی قرارداد منظور کر لی گئی اے۔ قومی اسمبلی وچ قرار داد وزیر امور کشمیر برجیس طاہر نے پیش کیتی۔ قرارداد دے متن مطابق وفاقی حکومت امریکی ایکشن خلاف سفارتی اقدامات کرے۔ امریکی صدر دا فیصلا مسلم امہ اُتے براہ راست حملا اے۔ قرارداد وچ آکھیا گیا کہ امریکی فیصلا سلامتی کونسل دیاں قرارداداں دے اُلٹ اے۔ امریکا مقبوضہ بیت المقدس نوں اسرائیلی راجدھانی منن دا فیصلا واپس لوے۔
