اسلام آباد(پاکستان پوائنٹ نیوز03۔اکتوبر2017ء) سپریم کورٹ وچ عمران خان دی نااہلی کیس دی سنوائی دوران چیف جسٹس نے اپنے ریمارکس وچ آکھیا اے کہ بنی گالا زمین بے نامی ہوئے وی تے اصل مالک جمائما سی‘ صر ف 6.5فیصد رقم دی ٹریل ثابت نہیں ہوئی‘ درخاست گزار مطابق اکاؤنٹ وچ موجود 99ہزار پاؤنڈ وی ظاہر کرنے چاہیدے سن۔ منگل نوں چیف جسٹس آف پاکستان جسٹس میاں ثاقب نثار دی سربراہی وچ جسٹس عمر عطا بندیال تے جسٹس فیصل عرب اُتے مشتمل تن رکنی بنچ نے تحریک انصاف خلاف غیر ملکی فنڈنگ تے عمران خان دی نااہلی بارے درخاست دی سنوائی کیتی۔
سنوائی دوران چیف جسٹس نے اپنے ریمارکس وچ آکھیا کہ نیازی سروسز لندن فلیٹ دا ٹیکس بچان لئی بنائی گئی، ایہدے اکاؤنٹ وچ عمران خان دی ذاتی رقم آؤندی رہی جدکہ 2003مگروں اکاؤنٹ دیاں تفصیلاں وی نہیں دتیاں گئیاں۔ درخاست گزار مطابق اکاؤنٹ وچ موجود 99ہزار پاؤنڈ وی ظاہر کرنے چاہیدے سن۔ درخاست گزار مسلم لیگ (ن) دے رہنما حنیف عباسی دے وکیل اکرم شیخ نے عدالت وچ موقف اختیار کیتا کہ پیش کیتیاں گئیاں دستاویزات شک والیاں نہیں ہونیاں چاہیدیاں سن، دستاویزات مشکوک نیں‘ دو خط پیش کیتے گئے‘ جہناں دے دستخط آپس وچ نہیں رلدے۔
ایہدے اُتے چیف جسٹس نے آکھیا کہ اسیں پچھلی سنوائی اُتے ایہ اعتراض سُن کے نوٹ کر لیا سی‘ درخاست گزار دا موقف اے کہ دستاویزات جعلی نیں، ٹیکس نمبرز تے دستخط دے نال نال ہور غلطیاں وی نیں۔ اکرم شیخ نے آکھیا کہ کوئی وی وکیل اجیہیاں دستاویزات سپریم کورٹ ساہمنے پیش نہیں کر سکدا۔
