اسلام آباد(پاکستان پوائنٹ نیوز03۔اکتوبر2017ء) وزیر اعلا پنجاب میاں محمد شہباز شریف نے آکھیا اے کہ نواز شریف چاراں صوبیاں دی تائید نال پارٹی صدر منتخب ہوئے‘ مخالفاں نوں رولا پان دا کوئی حق نہیں‘ مسلم لیگ (ن) جھوٹھے وعدیاں دی بجائے عملی کماں اُتے یقین رکھدی اے‘ نواز شریف دا لوڈشیڈنگ ختم کرن دا دعدہ پورا ہو رہیا اے‘ کُجھنویں مشیراں نے وزارتاں تے گڈیاں لئی نواز شریف نوں غلط مشورے دتے۔
میاں صاحب اوہناں نال مشورے نہ کرن‘ جہناں نوں صرف وڈیاں وڈیاں گڈیاں چاہیدیاں۔ مسلم لیگ (ن) دی مرکزی جنرل کونسل نال خطاب کردے ہوئے شہباز شریف نے آکھیا کہ میاں نواز شریف چاراں صوبیاں دی تائید نال پارٹی صدر منتخب ہوئے۔ کئی سیاسی پارٹیاں نے ترمیم دی مخالفت کیتی، آکھیا گیا کہ اک بندے لئی قانون بنایا جا رہیا اے، منتخب مقفنہ نے قانون بنایا ایہدے تحت نواز شریف نوں منتخب کیتا گیا، مخالفاں نوں رولا پان دا کوئی حق نہیں اے‘ دھرنے دین والیاں نے ملکی معیشت نوں بری طرحاں نقصان پہنچایا۔
شہباز شریف دا اپنے خطاب وچ کہنا سی کہ ملکوں انھیریاں دے خاتمے دا وعدہ کیتا جو اج پورا ہو رہیا اے۔ 15ورھے وچ ملکی وسائل نوں بری طرحاں لُٹیا گیا۔ اوہناں نے آکھیا کہ پچھلے چار ورھیاں وچ نواز شریف دی قیادت وچ ترقی دے سفر نوں سنہرے دورے نال تعبیر کیتا جائے گا۔
