اسلام آباد(پاکستان پوائنٹ نیوز03۔اکتوبر2017ء) تحریک انصاف نے الیکشن بل 2017وچ ترمیم نوں رد کر دے ہوئے بھرپور احتجاج کرن دا اعلان کر دتا اے۔ پی ٹی آئی رہنما فواد چودھری نے آکھیاکہ چوراں نے رلکے علی بابر نوں سردار چُن لیا اے۔ ٹیکس چور نوں فیر پارٹی سربراہ متھ لیا، عدالت ولوں اسحاق ڈار دی درخاست رد کرنا چنگی گل اے، سانوں اسمبلیاں تحلیل کر کے نواں الیکشن کروانا چاہیدا۔
اوہناں نے اج میڈیا نال گل بات کردے ہوئے آکھیا کہ 500چوراں نے رلکے علی بابا نوں سردار منتخب کیتا۔ ٹیکس چور نوں فیر پارٹی سربراہ متھ لیا اے۔ خواجا سعد رفیق ڈھائی سال توں اسٹے آرڈر اُتے بیٹھے ہوئے نیں۔ اوہناں نے آکھیا کہ نواز شریف دے سجے کھبے منی لانڈرنگ کرن والے بیٹھے ہوئے نیں۔ امیر مقام‘ ماروی میمن‘ طارق عزیز‘ دانیال عزیز ورگے لوک جدوں آ کے سجے کھبے بیٹھے ہون تے فیر پرویز مشرف دے قانون اُتے تنقید سمجھ توں باہر اے۔
اوہناں نے آکھیا کہ نواز شریف نے اپنی تقریر وچ اداریاں نوں نشانہ بنایا۔اسیں نواز شریف دی تقریر دی مذمت کردے آں۔ نواز شریف دی سیاست ختم ہو گئی اے۔ تُسیں (ن) لیگ نوں اپنے اشاریاں اُتے چلا سکدے او پر لوکائی نوں نہیں۔ اوہناں نے آکھیاکہ عمران خان خلاف اج مقدمہ ختم ہو گیا اے۔ عمران خان نے تہاڈے وانگ جھوٹھ دی داستان نہیں سنائی۔ تُسیں قطری خط پیش کیتا جدکہ عمران خان نے ساری ٹرانزیکشن سپریم کورٹ وچ پیش کر دتی۔
نواز شریف 300کمپنیاں کارن ملکی دولت باہرلے ملک لے گئے۔ مریم نواز دے اکاؤنٹ وچ راتوں رات پیسے منتقل کر دتے گئے۔ عدالت ولوں اسحاق ڈار دی درخاست ضمانت رد ہونا چنگی گل اے۔ اوہناں نے آکھیا کہ تحریک انصاف دا مطالبہ کیتا اے کہ سانوں ہن اسمبلیاں تحلیل کر کے نویں انتخابات ول جانا چاہیدا۔ فواد چودھری نے آکھیاکہ عمران خان ملک بھر وچ 13عوامی جلسیاں نال خطاب کرن گے۔ عوامی جلسیاں وچ آئین وچ ترمیم خلاف بھرپور اواز چُکی جائے گی۔
