لاہور(پاکستان پوائنٹ نیوز12۔اگست2017ء) سینیٹ وچ قائد حزب اختلاف چودھری اعتزاز احسن نے آکھیا اے کہ نواز شریف خلاف کوئی سازش نہیں ہوئی بلکہ اوہناں نے منتخب سویلین حکومتاں خلاف 10وار سازشاں کیتیاں تے ہن مکافات عمل دا ساہمنا کر رہے نیں، ایہ سڑکاں تے اپنے ای حکومت خلاف احتجاج کر رہے نیں بلکہ احتساب عدالت توں بچنا چاہندے نیں۔ اپنے اک انٹرویو و چ اعتزاز احسن نے ہور آکھیا کہ نواز شریف دی ریلی ناکام پر جلسے کامیاب نیں، اوہ قانون دی کندھ توڑ کے ایتھوں باہر آنا چاہندے نیں پر اوہدے کول بچن دا کوئی راہ نہیں اے، اوہ بند گلی وچ وڑ گئے نیں۔
اوہناں دس وار سازشاں کیتیاں تے ہن ایہ مکافات عمل دا ساہمنا کر رہے نیں۔ اوہناں نے محمد خان جونیجو، بے نظیر بھٹو، یوسف رضا گیلانی سنے کئی لوکاں خلاف سازشاں کیتیاں۔ ایہ اپنی پارٹی دے سربراہ خلاف سازش کر کے وزیر اعظم بنے تے جدوں عہدے توں ہٹے تے فاروق لغاری تے سجاد علی شاہ نال رلکے سازشاں کیتیاں تے جدوں فیر وزیر اعظم بن گئے فیر وی سازش توں باز نہیں آئے تے بی بی نوں 5سال دی سزا کرا دتی۔
