پاکستان کُجھ لوکاں دی جاگیر نہیں اے، ملک دے اصل مالک پاکستان دے 20کروڑ لوک نیں، اُداس نہ ہونا، فکر نہ کرنا، انشاء االلہ ایہ تہاڈی جِت اے:مریدکے وچ خطاب

مریدکے(پاکستان پوائنٹ نیوز12۔اگست2017ء) سابق وزیر اعظم محمد نواز شریف نے آکھیا کہ پاکستان کُجھ لوکاں دی جاگیر نہیں اے، ملک دے اصل مالک پاکستان دے 20کروڑ لوک نیں، تہاڈے ووٹ دی پرچی کُجھ لوک پاڑ کے تہاڈے ہتھ پھڑا دیند ے نیں، انقلاب آنا چاہیدا یاں نہیں؟۔ ہفتے نوں جی ٹی روڈ تے ریلی دے مریدکے پہنچن تے عوامی اجتماع نال خطاب کردے ہوئے نواز شریف نے آکھیا کہ مریدکے تے کامونکی دا جذبہ ایس طرحاں زندگی وچ پہلے کدی نہیں ویکھیا۔

مریدکے دا ایہ جذبہ جے سلامت اے تے انشاء اللہ خیر ای خیر اے۔ نواز شریف نے لوکائی نوں مخاطب کردے ہوئے آکھیا کہ اُداس نہ ہونا، فکر نہ کرنا، انشاء االلہ ایہ تہاڈی جِت اے۔نواز شریف نے آکھیا کہ کُجھ لوک پاکستان دے مالک نہیں ہو سکدے۔ پاکستان دے ویہ کروڑ لوک ملک دے اصلی مالک نیں۔ نواز شریف نے آکھیا کہ میں تہاڈے توں سوال کرنا واں کہ پاکستان دے اصلی مالک کون نیں؟ جہدے تے جلسے دے رلتیاں نے جواب دتا کہ عوام نیں۔