اسلام آباد(پاکستان پوائنٹ نیوز11۔اگست2017ء) عوامی مسلم لیگ دے سربراہ شیخ رشید احمد نے آکھیا اے کہ نواز شریف اپنیاں کرتوتاں دی وجہ توں نااہل ہوئے پر فیر وی اداریاں خلاف زہر بکن دی پالیسی تے عمل کر رہے نیں جو دُکھ دی گل اے۔ شیخ رشید نے اج نجی ٹی وی نال گل بات کرد ے ہوئے آکھیا کہ نواز شریف نوں کسے سازش دے تحت نہیں بلکہ اوہناں دیاں اپنیاں کرتوتاں تے کرپشن دی وجہ توں نااہل کیتا گیا اے ایہدے مگروں وی اوہ غلطی منن دی بجائے لوکائی دے مونڈھیاں تے بندوق رکھ کے اداریاں خلاف زہر بک رہے نیں جو ایس گل دا ثبوت اے کہ اوہناں دے ارادے خراب نیں۔
عوامی مسلم لیگ دے سربراہ نے آکھیا کہ نواز شریف نے ریلی کڈھ کے ٹکر لین دی پالیسی اپنائی پر اوہناں دی مقبولیت دا ایہ حال اے کہ ریلی راولپنڈی وچ ناکام ثابت ہو گئی۔ اوہناں دا کہنا سی کہ نواز شریف لوکائی نوں بے وقوف سمجھدے نیں پر اوہ انج کر کے لوکائی وچ سچے نہیں ہو جان گے۔
