اسلام آباد(پاکستان پوائنٹ نیوز11۔اگست2017ء) پیپلز پارٹی دے چیئرمین بلاول بھٹو زرداری نے آکھیا اے کہ اگلی وار ملک وچ ساڈی حکومت ہوئے گی، پیپلز پارٹی (ن) لیگ نال نہیں بلکہ جمہوریت نال اے، آئین دے آرٹیکل 63,62تے رضا ربانی دا موقف ذاتی اے، پارلیمنٹ وچ ملٹری و جوڈیشری دا کوئی کردار نہیں ہونا چاہیدا، نواز شریف دا جی ٹی روڈ کارواں ڈرامہ لگدا اے۔
اوہناں نے اج پریس کانفرنس کردے ہوئے آکھیا کہ پاناما ایشو سبھ توں پہلاں پیپلز پارٹی نے چُکیا۔ پیپلز پارٹی (ن) لیگ نال نہیں بلکہ جمہوریت نال اے۔ سسٹم نوں کوئی خطرا نہیں صرف نواز شریف دی ذات نوں خطرا اے۔ نواز شریف دا کوئی نظریہ نہیں اوہ صرف اپنے آپ نوں بچانا چاہندے نیں۔بلاول دا کہنا سی کہ نواز شریف نوں جدوں ہٹایا گیا تے اوہناں نوں سبھ یاد آر ہیا اے۔ عجیب گل اے کہ جدوں نواز شریف حکومت وچ ہوندے نیں تے میثاق جمہوریت یاد نہیں رہندا۔ نواز شریف ذالفقار بھٹو تے محترمہ تے کیتے گئے ظلماں پچھے لُکنا چاہندے نیں پر اسیں اوہناں لُکن نہیں دیواں گے۔ اوہناں نے آکھیا کہ اسیں گالھاں کڈھن دی نظریاتی سیاست نہیں کراں گے۔
