اسلام آباد(پاکستان پوائنٹ نیوز16۔جون2017ء) قومی اسمبلی وچ قائد حزب اختلاف سید خورشید شاہ نے آکھیا کہ کٹھ پتلی دا ناچ کون نچا رہیا، کون نچ رہیا، مینوں سبھ پتا اے، میاں صاحب وی جاندے نیں۔ وزیر اعظم دے جے آئی ٹی وچ پیش ہون نال سبھ کُجھ ختم نہیں ہو گیا، جے آئی ٹی دا قطر جانا اوہناںد ے وقار دے منافی اے، پاکستان نوں ’بنانا پبلک‘ ملک بنایا جا رہیا اے۔
اوہناں نے اج میڈیا نال گل بات کردے ہوئے آکھیا کہ وزیر اعظم توں شاید اسمبلی دے اندر یاں باہردیاں گلاں بارے سوال کیتے گئے نیں۔ نواز شریف دی تھاں ہوندا تے جے آئی ٹی ساہمنے بطور وزیر اعظم نہ جاندا۔ نواز شریف نے لکھی ہوئی تقریر پڑھی جہدے توں لگدا شاید میاں صاحب کول سچائی لئی کُجھ نہیں اے۔ اوہناں نے آکھیا کہ نواز شریف نے جے آئی ٹی مگروں قوم نال گل بات کیتی۔
خورشید شاہ دا کہنا سی کہ ملک نوں ’بنانا پبلک‘ ملک بنایا جا رہیا اے۔ اوہناں نے آکھیا کہ میاں صاحب بھولے بادشاہ نیں، میاں صاحب کسے نوں بھولا بنان لئی بھولے بن جاندے نیں۔ اوہناں نے آکھیا جے کُجھ ہو جائے تے صوبائی اسمبلی اُتے اثر نہیں پئے گا۔ قومی اسمبلی ختم ہون نال صوبائی اسمبلی دی شق موجود نہیں۔ میری دعا اے کہ اسمبلیاں اپنا ویلا پورا کرن۔ خورشید شاہ نے آکھیا کہ اداریاں نوں بدنام تے دھمکیاں دین اُتے کوئی پُچھن والا نہیں ۔ جے آئی ٹی دا قطر جانا اوہناں دے وقار دے منافی اے۔ خورشید شاہ نے آکھیا کہ پیپلز پارٹی دا یقین اے کہ اوہناں دی طاقت عوام اے۔خورشید شاہ دا کہنا سی کہ پیپلز پارٹی دے وزیر اعظم دو وار عدالتاں وچ پیش ہوئے۔
