اسلام آباد(پاکستان پوائنٹ نیوز16۔جون2017ء) تحریک انصاف دے چیئرمین عمران خان نے آکھیا اے کہ شریف فیملی اپنے بالاں دے سِر اُتے ہتھ رکھ کے آکھ دیوے کہ قطری دا خط فراڈ نہیں اے تے میں من جاواں گا، پی ٹی آئی نے الیکشن دی تیاری شروع کر دتی، پورے ملک وچ کلین سویپ کراں گے، پارٹی ٹکٹ میرٹ اُتے دیواں گے، امتیاز صفدر وڑائچ نوں جی آیاں آکھنے آں۔ تفصیل مطابق پی ٹی آئی چیئرمین عمران خان نے اج میڈیا نال گل بات کردے ہوئے آکھیا کہ پاکستان توں ہر سال 10ارب ڈالر ملکوں باہر جاندا اے۔
منی لانڈرنگ کارن ملک مقروض ہو گیا۔اوہناں حکومت نوں تنقید دا نشانا بناندے ہوئے آکھیا کہ اقتدار وچ آکے اپنے آپ نوں فائدا پہنچانا کرپشن آکھواندا اے۔ ایہناں اُتے منی لانڈرنگ، ٹیکس چوری، پیسہ کیویں بنایا ورگے چارالزام نیں۔ عمران خان د اکہنا سی کہ جدوں ایہناں نوں آکھو کہ ٹرانزیکشن وکھاﺅ تے ایہ طوطے مینے دی کہانی شروع کر دیندے نیں۔ اوہناں دا کہنا سی کہ جے قطری دا خط سچ ہوندا تے ٹرانزیکشن وکھا دیندے۔
ایہ آکھدے نیں کہ اوہناں دا تن نسلاں دا احتساب ہویا، میں کہنا واں کہ ایہناں دا پہلی وار احتساب ہو رہیا اے۔ مشرف دور وچ این آر او دستخط کر کے ملکوں باہر چلے گئے۔ عمران خان نے آکھیا کہ ساری قوم سپریم کورٹ تے جے آئی ٹی نال کھلوتی اے۔ ایہ ڈرا رہے نیں کہ فیصلا نواز شریف دی حمایت وچ نہ آیا تے قوم اوہنوں نہیں منے گی ۔ پر قوم کیویں نہیں منے گی؟ اسیں منواواں گے، قومی فیصلا منوائے گی۔
اوہناں دا کہنا سی کہ کیہ الیکشن جِت کے آن والے دا احتساب نہیں ہونا چاہیدا؟ عمران خان دا کہنا سی کہ اجے وی ٹائم اے کہ جے آئی ٹی وچ تحقیقات ہون تیک وزیر اعظم عہدے توں مستعفی ہو جان۔عمران خان نے آکھیا کہ جدوں جے آئی ٹی بنی تے (ن) لیگ نے مٹھیائیاں ونڈیاں اج اوہی اوہناں اُتے تنقید کر رہے نیں۔ اوہناں دا قطری خط دے حوالے نال کہنا سی کہ میاں صاحب دی فیملی اپنے بالاں دے سِر اُتے ہتھ رکھ کے آکھ دیوے کہ قطری دا خط فراڈ نہیں اے تے اسیں من لواں گے۔
