راولپنڈی، چمن(پاکستان پوائنٹ نیوز05۔مئی2017ء) افغان فورسز ولوں بلوچستان دے شہر چمن دے علاقے کلی لقمان تے کل جہانگیر وچ انھے واہ فائرنگ دے نتیجے وچ سوانی تے دو بالاں سنے 9شہری ہلاک جدکہ ایف سی اہلکاراں ،بالاں تے سوانیاں سنے 50توں ودھ بندے ڈاڈھے زخمی ہو گئے، زخمیاں نوں فوری طور اُتے لاگے د ے ہسپتال منتقل کر دتا گیا اے جہناں وچوں کئی دی حالت خطرے وچ دَسی گئی اے جس کارن موتاں وچ وادھے دا خدشا اے۔
پاک فوج نے فوری جوابی کارروائی کردے ہوئے افغان فورسز دیاں کئی چوکیاں نوں تباہ کر دتا۔ آخری اطلاع تک فائرنگ دا سلسلا جاری رہیا، پاک افغان بارڈر کشیدا صورتحال کارن بند کر دتاگیا۔ آئی ایس پی آر دے مطابق جمعے دی سویر چار وجے ایف سی دے سکیورٹی دستےاں اُتے افغان فورسز نے انھے واہ فائرنگ شروع کر دتی، فائرنگ دے نتیجے وچ اک سوانی تے دو بالاں سنے 9شہری ہلاک جدکہ چار بلوچ ایف سی اہلکاراں تے بالاں و سوانیاں سنے 50توں ودھ بندے زخمی ہوگئے۔
جہناں نوں ڈاکٹری امداد لئی کوئٹہ ہسپتال منتقل کر دتا گیا اے۔ جتھے کئی زخمیاں دی حالت خطرے وچ اے۔ سرحد اُتے کشیدا صورتحال نوں مُکھ رکھدے ہوئے پاک افغان بارڈر بند کر دتا گیا۔ افغان فورسز ولوں واضح طور اُتے سویلین آبادی اُتے مارٹر گولے سُٹے گئے۔ دوجے پاسے پاک فوج ولوں وی افغان فورسز نوں فائرنگ دا مونہ توڑ جواب دتا گیا، جہدے نتیجے وچ افغان فورسز دے کئی اہلکاراں دے ہلاک ہون دی اطلاع اے۔
