لاہور(پاکستان پوائنٹ نیوز05۔مئی2017ء) وزیر اعلا پنجاب میاں محمد شہباز شریف نے اج پسرور دے علاقے پورب کلے وچ کنک دی خریداری مرکز اُتے اچن چیت چھاپاماریا ۔وزیر اعلا دے دورے دوران اوتھے موجود کئی بندیاں نے اک بُڈھے کسان نوں پرے کرن دی کوشش کیتی، جہدے اُتے وزیر اعلا پنجاب نے متعلقہ بندیاں دے ایس رویے اُتے خفگی دا وکھالا کیتا تے بُڈھے کسان نوں اپنے کول بُلاکے گَل لاندے ہوئے آکھیا کُھل کے گل کرو، تُہاڈی شکایت دا اُپاءہووے گا میں ایتھے تہاڈی گل سُنن ای آیا واں۔
میرے لئی تُسیں احترام جوگ او، میں کساناں دی خدمت لئی اج کنک خریداری مرکز آیا واں۔ اوہناں نے آکھیاکہ میرے ہوندے ہوئے کوئی کسان دااستحصال نہیں کر سکدا تے میں پہلے وی کساناں دی خدمت کیتی اے تے آن والے ویلے وچ وی کراں گا۔ وزیر اعلا نے کساناں نوں خریداری مرکز اُتے دِتیاں جان والیاں سہولتاں بارے وی پُچھیا۔
