لاہور(پاکستان پوائنٹ نیوز02۔نومبر۔2018ء) مریم نواز نے ٹویٹر اُتے علامہ خادم حسین رضوی دی تقریر لائیک کر دتی۔ تفصیل مطابق آسیہ بی بی بارے سپریم کورٹ دے فیصلے مگروں پنجاب سنے ملک بھر وچ احتجاجی وکھالے کیتے جا رہے نیں۔ ملک بھر وچ احتجاج دی وجہ توں لوک پریشان نیں۔ پر انج دے ماحول وچ سابق وزیر اعظم نواز شریف دی دھی مریم نواز اک وار فیر سوشل میڈیا اُتے خبراں دی زینت بن گئیاں نیں۔مریم نواز اُنج تے رہائی مگروں چُپ سن ۔ پر اج اوہناں نے تحریک لبیک دے سربراہ علامہ خادم حسین رضوی دی تقریر نوں ٹویٹر اُتے لائیک کیتا اے۔جیہدے مگروں سوشل میڈیا ورتیندڑاں (صارفین) نے اک نویں بحث چھیڑ دتی اے۔ خبر وائرل ہون مگروں مریم نواز نے حالات دی نزاکت نوں سمجھدے ہوئے ویڈیو تے ان لائیک کر دتی پر کُجھ ورتیندڑاں نے پہلے ای مریم نواز ولوں خادم حسین رضوی دی تقریر اُتے لائیک دے سکرین شوٹس لئے تے ویڈیو وی بنالئی۔
ایس حوالے نال وزارت سمندر پار پاکستانی و وزیر اعظم دے معاون خصوصی زلفی بخاری نے ٹویٹ کردے ہوئے آکھیا کہ ہراک دا اپنا مکتبہ فکر اے پر منافرت کھلارن والے بیاناں نوں لائیک کرنا بغیر کسے شک دے سیاست دا ہیٹھلا درجہ اے۔
ایس توں وکھ وی کئی سوشل میڈیا ورتیندڑاں نے ایس بارے ٹویٹ کیتے ۔ اک ورتیندڑ نے آکھیا کہ مریم نواز خادم حسین رضوی نوں سپورٹ کر رہیاں نیں۔
