اسان پرڏيهي پاليسي جي ايڊوائيزري ڪائونسل جوڙي آهي: شاهه محمود قريشي

اسلام آباد (پاکستان پوائنٹ نیوز28دسمبر 2018ء) پرڏيهي وزير شاهه محمود قريشي چيو آهي ته اسان پرڏيهي پاليسي جي ايڊوائيزري ڪائونسل جوڙي آهي جيڪا پرڏيهي پاليسي بابت غيرجانبداراڻي راءِ ڏيندي. جمعي ڏينهن ڪائونسل جي قيام کانپوءِ پرڏيهي وزير پنهنجي هڪ بيان ۾ چيو آهي ته هي ايڊوائيزري ڪائونسل انتهائي مڃيل تجربيڪار ماڻهن تي ٻڌل آهي ان ۾ اڳوڻا سفير ۽ پرڏيهي سيڪريٽري به شامل آهن اهي سمورا سفارتڪار، پنهنجي وسيع تجربي جي بنياد تي پنهنجي ماهراڻي راءِ ڏيندا، ان کان سواءِ اسان تدريسي شعبي سان لاڳاپيل ملڪ جي ناليوارين يونيورسٽين سان لاڳاپيل ماهرن کي به شامل ڪيو آهي ته جيئن اهي ماهر پنهنجي يونيورسٽين ۾ ٿيندڙ انتهائي مستند تحقيق جي نتيجن کان به اسان جي پرڏيهي پاليسي کي فائدو پهچائين. هن چيو ته اهڙا مسئلا جن تي عام طور تي ڌيان نٿو ڏنو وڃي مثال طور قومي وسيلن جي تسخير ۾ ايندڙ رڪاوٽون، مختلف معاشي مسئلا وغيره انهن تي به اسان خاص ڌيان ڏينداسين ان لاءِ اسان عالمي شهرت رکندڙ، ناليواري عالم عادل نجم صاحب کي به شامل ڪيو آهي. پرڏيهي وزير وڌيڪ چيو ته هڪ تنقيد جيڪا اڪثر ٻڌڻ ۾ ايندي آهي ته اسان جي پرڏيهي پاليسي سدائين دفاع تي رهندي آهي ۽ معاشي رخن کي نظرانداز ڪيو ويندو آهي اهڙي تنقيد کي نظر ۾ رکندي اسان اهڙن ماڻهن کي به شامل ڪيو آهي جيڪي معاشيات ۽ واپار جي شعبن سان واڳيل آهن، هن اميد ظاهر ڪئي ته انهن ماهرن جي مشاورت ۽ جامع هدايتن جي روشني ۾ پرڏيهي پاليسي وسيع رخ جو احاطو ڪندي. ان لاءِ اسان فنانس، پلاننگ ۽ ڪامرس جي وزيرن کي به شرڪت جي دعوت ڏني آهي، هن چيو ته اسان نه رڳو پرڏيهي آفيس پر فارن سروس اڪيڊمي اسلام آباد جهڙي اداري کي به ڪائونسل سان ڳنڍيو ويو آهي ڇو ته اسان جا قابل سفارتڪار انهي اداري مان عملي تربيت حاصل ڪري نڪرندا آهن جڏهن ته اسان پرڏيهي پاليسي جي حڪمت عملي جي حوالي سان مشاورت جي لاءِ ڊائريڪٽر جنرل انسٽيٽيوٽ آف اسٽريٽجڪ اسٽيڊيز کي به ان ايڊوائيزري ڪائونسل ۾ شامل ڪيو آهي، هن چيو ته جلد ئي ايڊوائيزري ڪائونسل جي گڏجاڻي گهرائي ويندي جنهن ۾ سمورا جوڙيل قاعدا، ضابطا پيش ڪيا ويندا، ان کانپوءِ گڏجاڻين جو اهو سلسلو تسلسل سان جاري رهندو، هن وضاحت ڪندي چيو ته اهي سمورا ماهر پنهنجون خدمتون رضاڪاراڻي طور تي سرانجام ڏيندا جنهن سان سرڪاري خزاني تي قطئي طور تي ڪو بار نه پوندو.