اسلام آباد (پاکستان پوائنٹ نیوز28دسمبر 2018ء) وزيراعظم عمران خان غربت جي خاتمي، بيروزگار ماڻهن کي هنرمند بڻائڻ ۽ غربت جي لڪير کان هيٺ خاندانن جي خوراڪ جي ضرورتن کي پورو ڪرڻ جي لاءِ بينظير انڪم سپورٽ پروگرام کي جلد حتمي شڪل ڏيڻ جي هدايت ڪندي چيو آهي ته غربت جو خاتمو ۽ ڪمزور طبقي جي ڀلائي حڪومت جي اولين ترجيح آهي. هن اها ڳالهه بينظير انڪم سپورٽ پروگرام جي چيئرپرسن ڊاڪٽر ثانيه نشتر سان ڳالهائيندي چئي جنهن جمعي ڏينهن وزيراعظم سان ملاقات ڪئي. ڊاڪٽر ثانيه بينظير انڪم سپورٽ پروگرام جي حوالي سان مختلف معاملن تي وزيراعظم کي بريفنگ ڏني، ان موقعي تي وزيراعظم چيو ته رياست احساس جو نالو آهي جيڪا معاشري جي ڪمزور طبقن کي مٿي کڻڻ ۾ پنهنجو ڪردار ادا ڪندي آهي، وزيراعظم ان ڳالهه تي زور ڏنو ته غربت جي خاتمي جي لاءِ هڪ اهڙو تفصيلي پروگرام جوڙي رهيا آهيون جيڪو صرف غربت کان متاثر ماڻهن جي وقتي ضرورتن کي پورو ڪرڻ تائين ئي محدود نه هجي پر جامع انداز ۾ ڪمزور طبقن کي غربت جي چنبي مان ڪڍڻ ۾ ڀرپور ڪردار ادا ڪري. هن هدايت ڪئي ته غربت جي چئلينج کي منهن ڏيڻ لاءِ ضروري آهي ته ان سلسلي ۾ جاري مختلف پروگرامن جي وچ ۾ رابطو ۽ تعاون هجي.
غربت جو خاتمو ۽ ڪمزور طبقي جي ڀلائي حڪومت جي اولين ترجيح آهي: وزيراعظم عمران خان
5 سال پھريان
