مذهبي تعليمن ۾ انسانيت جي خدمت کي اهم مقام حاصل آهي: صدر ڊاڪٽر عارف علوي

اسلام آباد (پاکستان پوائنٹ نیوز21دسمبر 2018ء) صدر ڊاڪٽر عارف علوي چيو آهي ته مذهبي تعليمن ۾ انسانيت جي خدمت کي اهم مقام حاصل آهي، ڇوٽڪاري جو اصل رستو انسانيت جي خدمت ۾ لڪل آهي، اسان اهڙو نئون پاڪستان ٺاهڻ چاهيون ٿا جتي امير ۽ غريب ۾ ڪو به فرق نه هجي، بين المذاهب هم آهنگي هجي، پيڙهيل طبقن ۽ خاص طور تي اقليتن ۽ عورتن جي حقن جو تحفظ يقيني هجي. اهڙن خيالن جو اظهار هن جمعي ڏينهن ايوان صدر ۾ ڪرسمس جي تقريب کي خطاب ڪندي ڪيو. هن چيو ته ڀارت ۽ پاڪستان سميت سڄي دنيا ۾ پادرين اهم خدمتون سرانجام ڏنيون آهن، رٿ فائو انساني خدمت جي بهترين مثال آهي جنهن پنهنجي سڄي زندگي پاڪستان ۾ انسانيت جي خدمت ڪندي گذاري. هن چيو ته انسان هر وقت سچائي جي ڳولا ۽ خدمت جي لاءِ تيار رهي ٿو، جتي ان کي ڏک ۽ تڪليف نظر اچي ٿي ان کي ختم ڪرڻ جي لاءِ ڪوشش ڪري ٿو. هن چيو ته اسلام ۾ ٻين مذهبن جي احترام تي زور ڏنو ويو آهي، حضور اڪرم صه بادشاهه نجاسي جو تمام گهڻو احترام ڪندو هو، هڪ ڀيرو جڏهن عيسائين جو هڪ وفد مديني ۾ آيو ته هن حضور اڪرم صه کان عبادت جي اجازت گهري ۽ پاڻ صه وفد کي مسجد نبوي صه ۾ عبادت جي اجازت ڏني، اهو بين المذاهب هم آهنگي جو شاندار مثال آهي. هن چيو ته سينٽ ڪيٿرائن چرچ ۾ هڪ دستاويز موجود آهي جنهن ۾ حضور پاڪ صه پاران لکيو ويو آهي ته اهو معاهدو منهنجي وچ ۾ ۽ منهنجي امت سان مسيحي برادري سان آهي ۽ قيامت تائين آهي، اهو مسلمانن ۽ عيسائين جي وچ ۾ هم آهنگي جي لاءِ بهترين دستاويز آهي. هن چيو ته اسلامي رياست ۾ اقليتن جي حقن ۽ عبادتگاهن جي تحفظ تي خاص زور ڏنو ويو آهي. هن چيو ته قائداعظم محمد علي جناح به 11 آگسٽ 1947ع تي سمورين اقليتن کي برابر حق ڏيڻ جو واعدو ڪيو، 23 مارچ 1940ع جي قرارداد جي پنجاب اسيمبلي ۾ مسيحي ميمبرن پڻ حمايت ڪئي. هن چيو ته پاڪستان جي لاءِ مسيحي برادري جون قابل قدر خدمتون آهن، سمورن پيغمبرن انسانيت جا ڏک گهٽ ڪرڻ جي لاءِ جدوجهد ڪئي. هن چيو ته فلسطين ۾ آزادي جي جدوجهد ۾ به مسيحي برادري اهم ڪردا ادا ڪيو، مسيحي برادري جا پاڪستان ۾ ڊيم فنڊ لاءِ عطيا ڏيڻ جي آجيان ۽ ٿورا مڃان ٿو. هن چيو ته اسان اهڙو نئون پاڪستان ٺاهڻ چاهيون ٿا جتي امير ۽ غريب ۾ ڪو فرق نه هجي، غريبن جي ڏک ۾ گهٽتائي اچي، پاڪستان جي جهنڊي کي گڏ کڻي هلڻ چاهيون ٿا، جنهن ۾ هندو، سک، مسيحي سميت سموريون قومون رهن ٿيون، ان گلدستي کانسواءِ نئون پاڪستان نه ٿو ٺهي سگهي، پيڙهيل طبقن ۽ عورتن کي گڏ کڻي هلنداسين ته نئون پاڪستان ٺهندو. ان موقعي تي صدر ڊاڪٽر عارف علوي مسيحي برادري کي ڪرسمس جي مبارڪباد پڻ ڏني. ان موقعي تي ايڊورڊ ڪاليج پشاور جي شاگردن ڪرسمس سان لاڳاپيل گيت پڻ پيش ڪيا ۽ ڪرسمس جو ڪيڪ پڻ ڪاٽيو ويو. ڪرسمس جي حوالي سان ايوان صدر کي رنگا رنگ روشنين ۽ ڪرسمس ٽري کي سجايو ويو هو.