فاٽا بابت قرارداد اتفاق راءِ سان منظور

اسلام آباد (پاکستان پوائنٹ نیوز18دسمبر 2018ء) سينيٽ فاٽا کي خيبرپختونخوا کي ضم ڪرڻ وقت اين ايف سي ايوارڊ جو ٽي سيڪڙو ڏيڻ ۽ علائقي جي نوجوانن جي لاءِ روزگار جا 20 هزار موقعا پيدا ڪرڻ جي واعدي جي حوالي سان قرارداد اتفاق راءِ سان منظور ڪري ورتي آهي. اڱاري ڏينهن سينيٽ جي اجلاس ۾ ان سلسلي ۾ قرارداد پيش ڪئي وئي جنهن تي روينيو واري مملڪتي وزير حماد اظهر چيو ته ان سلسلي ۾ قرارداد ۾ بيان ڪيل واعدي جو اين ايف سي سيڪريٽريٽ ۾ ڪو رڪارڊ نه آهي، هن چيو ته اين ايف سي ايوارڊ جي لاءِ ايندڙ اجلاس ۾ معاملا غور هيٺ ايندا. هن چيو ته اين ايف سي ايوارڊ جي لاءِ پنجاب، خيبرپختونخوا ۽ بلوچستان مان نامزدگي ملي چڪي آهي، سنڌ مان اڃان تائين نامزدگي ناهي آئي جيئن ئي سنڌ کان نالو ملندو، اين ايف سي جي لاءِ اجلاس طلب ڪيو ويندو، حماد اظهر چيو ته جيڪي به ڪنهن سطح تي واعدا ڪيا ويا آهن اهي پورا ڪيا ويندا. پارلياماني معاملن وارو مملڪتي وزير علي محمد خان چيو ته ارڙهين ترميم کانپوءِ اسان جي پارليامينٽ سڀ کان وڏو ڪم فاٽا جي انضمام جي حوالي سان ڪيو جنهن جي سمورين پارلياماني پارٽين حمايت ڪئي هئي، هن چيوته 50 ارب روپيا مسلسل فاٽا جي لاءِ فراهم ڪيا پيا وڃن ۽ 100 ارب روپيا وڌيڪ فراهم ڪيا ويندا، هن چيو ته اسان خيبرپختونخوا ۾ شامل ٿيندڙ فاٽا جي عوام سان گڏ آهيون، وزيراعظم اتر وزيرستان جي دوري دوران به جن فنڊز جو اعلان ڪيو هو اهي فاٽا کي فراهم ڪيا ويندا، سينيٽر محمد ايوب چيو ته وزيراعظم سان اسان جي ملاقات ۾ به فاٽا جي لاءِ ٽي سيڪڙو ڏيڻ جي ڳالهه ٿي هئي، اسان سان ڪيل واعدا پورا ڪيا وڃن، وفاقي وزير نور الحق قادري چيو ته وزيراعظم ان حوالي سان واعدو ڪيو آهي ۽ ناڻي واري وزير جي هن ذميداري به لڳائي آهي ته هو صوبن سان ڳالهه ڪري ۽ اين ايف سي ايوارڊ جو ٽي سيڪڙو فاٽا جي لاءِ مختص ڪرائڻ جي لاءِ عملدرآمد جي لاءِ اڳڀرائي ڪري، انساني حقن واري وفاقي وزير شيرين مزاري چيو ته اسان ان قرارداد جي مخالفت نه ڪنداسين، سينيٽر مشتاق احمد چيو ته فاٽا ۾ هن وقت هڪ قانوني کوٽ آهي، قرارداد کي اتفاق راءِ سان منظور ڪرڻ گهرجي، قائد ايوان شبلي فراز چيو ته قرارداد ملتوي ڪئي وڃي، ان کانپوءِ چيئرمين قرارداد تي راءِ ورتي ته ايوان اتفاق راءِ سان قرارداد جي منظوري ڏئي ڇڏي.