ڏڪار جي صورتحال تي اين ڊي ايم اي ۽ پي ڊي ايم اي گڏجي ڪم ڪري رهيا آهن: علي محمد خان

اسلام آباد (پاکستان پوائنٹ نیوز14دسمبر 2018ء) پارلياماني معاملن واري مملڪتي وزير علي محمد خان ايوان کي ٻڌايو آهي ته ملڪ ۾ ڏڪار جي صورتحال تي اين ڊي ايم اي ۽ پي ڊي ايم اي گڏجي ڪم ڪري رهيا آهن، جمعي ڏينهن سينيٽ جي اجلاس ۾ سوالن جي وقفي دوران سينيٽر ميان محمد عتيق شيخ جي سوال جي جواب ۾ هن چيو ته ارڙهين ترميم کانپوءِ قدرتي آفتن کي منهن ڏيڻ جي ذميداري صوبن کي ڏني وئي آهي، ۽ لاڳاپيل صوبن جي بنيادي ذميداري آهي ته هو آفتن کان متاثر جڳهن جو انتظام ڪن، جڏهن ته اين ڊي ايم اي وفاقي سطح تي مددگار جي طور تي ڪم ڪندو آهي، اين ڊي ايم اي لاڳاپيل سرڪاري ادارن سميت هٿياربند فوج ۽ اين جي اوز، آءِ اين جي اوز ۽ يو اين او جي عطيو ڏيندڙ ادارن سان به ويجها رابطا رکندو آهي، ٿرپارڪر ۽ بلوچستان جي ڏڪار سٽيل علائقن ۾ اين ڊي ايم اي ڪم ڪري رهيو آهي، آزاد ڄمون ۽ ڪشمير ۾ 1122 جي ملازمن کي تربيت فراهم ڪري رهيا آهيون، هن چيو ته ملڪ کي ڏڪار جي صورتحال تي اين ڊي ايم اي، پي ڊي ايم اي سان گڏجي ڪم ڪري رهيو آهي.