ڪراچي ۾ گهريلو ڪمرشل صارفين ۽ ننڍين صنعتن لاءِ گئس جي ڪا به لوڊشيڊنگ نه آهي: غلام سرور خان

اسلام آباد (پاکستان پوائنٹ نیوز12دسمبر 2018ء) پيٽروليم واري وفاقي وزير غلام سرور خان چيو آهي ته ڪراچي ۾ گهريلو ڪمرشل صارفين ۽ ننڍين صنعتن لاءِ گئس جي ڪا به لوڊشيڊنگ نه آهي، سنڌ جي سي اين جي اسٽيشنن کي گئس جي صورتحال بهتر هجڻ تي فراهمي شروع ڪئي ويندي، اربع ڏينهن قومي اسيمبلي ۾ اعتراض واري نقطي تي عبدالقادر پٽيل چيو ته سنڌ ۾ 80 سيڪڙو گئس جي پيداوار آهي، سنڌ ۾ سموريوُن سي اين جي اسٽيشون ٻي حڪم تائين بند ڪيون ويون آهن ۽ عام صارفين کي به گئس جي حوالي سان شديد مشڪلاتون درپيش آهن، سنڌ جي پاڻي کانپوءِ گئس به بند ڪئي پئي وڃي،عبدالقادر پٽيل چيو ته سنڌ جي گئس بند ڪرڻ آئين جي آرٽيڪل 258 جي خلاف ورزي آهي، ان جي جواب ۾ پيٽروليم واري وزير غلام سرور خان چيو ته ڪراچي ۾ گهريلو صارفين، ڪمرشل صارفين ۽ زيرو ريٽيڊ صنعتن جي لاءِ گئس جي ڪا لوڊشيڊنگ نه آهي، آڪٽوبر ۾ اسان انهن کي نوٽيس ڏنو هو ته توهان متبادل توانائي تي اچي وڃو، سنڌ جي سي اين جي اسٽيشنن کي جيئن ئي صورتحال بهتر ٿيندي گئس جي فراهمي شروع ڪئي ويندي، هن چيو ته ڪنهڙ ۽ ڪجهه ٻين گئس جي کوهن مان گئس جي فراهمي ۾ گهٽتائي سبب اها صورتحال پيدا ٿي آهي، سيد نويد قمر چيو ته آئين جي آرٽيڪل 258 کي پائمال ڪيو پيو وڃي، اسان ڪنهن مخصوص سيڪٽر جي ڳالهه ناهي ڪئي اسان پوري صوبي جي آئيني حق جي ڳالهه ڪئي آهي، ان جي جواب ۾ پيٽروليم واري وزير غلام سرور خان چيو ته آئين جي ان آرٽيڪل جي وضاحت جي لاءِ اسان سپريم ڪورٽ سان رجوع ڪيو آهي هي مسئلو عدالت ۾ آهي، هن چيو ته انهن معاملن تي اسان جي سنڌ جي وڏي وزير سان ملاقات طئي آهي، سمورن مسئلن جو حل ڪڍيو ويندو.