آزادي جي ڏهاڙي تي ان عزم کي ورجائڻو پوندو ته پنهنجي ۽

اسلام آباد (پاکستان نیوز پوائنٹ 13 اگست 2016ء) صدر ممنون حسين چيو آهي ته آزادي جي ڏهاڙي تي ان عزم کي ورجائڻو پوندو ته پنهنجي ۽ ايندڙ نسل جي مستقبل جي تحفظ لاءِ هڪ ٿي پاڪستان جي بانين جي نقش قدم تي هلندي اونداهين جو خاتمو ڪنداسين ۽ روشنين کي پنهنجو مقدر بڻائينداسين، جمهوريت بابت گڏيل اتفاق راءِ جا مثبت اثر سامهون اچي رهيا آهن، انهن کي وڌيڪ ثمرن وارو ۽ مفيد بڻائڻ جي لاءِ ضروري آهي ته اسان جي دل ۽ دماغ جو حصو بڻجي حقيقي تبديلي جو ذريعو بڻجي وڃن، ملڪ کي بدامني، دهشتگردي ۽ انتهاپسندي کان پاڪ ڪرڻ جي لاءِ پاڪ فوج ۽ قانون لاڳو ڪندڙ ٻيا ادارا موثر ڪردار ادا ڪري رهيا آهن جنهن جي نتيجي ۾ پاڪستان ۾ امن امان بحال ٿي رهيو آهي. صدر اها ڳالهه آزادي جي ڏهاڙي جي موقعي تي قوم جي نالي پنهنجي پيغام ۾ چئي آهي.صدر چيو ته 14 آگسٽ کي اسان پنهنجي آزادي جو ڏهاڙو هڪ نئين جوش ۽ ولولي سان ملهائي رهيا آهيون ۽ اسان کي يقين ڪرڻ گهرجي ته اسان جو اهو جوش ۽ ولولو ايندڙ ڏينهن ۾ اسان جي لاءِ سياسي، اقتصادي ۽ سماجي استحڪام جو رستو هموار ڪندو. صدر چيو ته گذريل ڪجهه سالن کان ملڪ ڪيترين ئي آزمائشن ۾ ورتل رهيو آهي پر قوم پنهنجي پڪي عزم سان انهن مشڪلاتن کي منهن ڏنو، پاڪستان حڪومت ملڪ جي مختلف خطن، علائقن ۽ شهرن کي بدامني، دهشتگردي ۽ انتهاپسندي کان پاڪ ڪرڻ جي لاءِ ڀرپور سياسي عزم سان ڪارروائي جو فيصلو ڪيو جنهن تحت پاڪ فوج ۽ قانون لاڳو ڪندڙ ٻيا ادارا موثر ڪردار ادا ڪري رهيا آهن جنهن جي نتيجي ۾ پاڪستان ۾ امن بحال ٿي رهيو آهي. صدر چيو ته اهڙي طرح اقتصادي بهتري جي لاءِ پڻ حڪومت ٺوس پاليسيون اختيار ڪيون آهن جن جي نتيجي ۾ ڪاروباري ماحول بهتر ٿي رهيو آهي ۽ پاڪستان ۾ ملڪي ۽ پرڏيهي سيڙپڪاري جا نه رڳو بهتر موقعا پيدا ٿي رهيا آهن پر ٻاهرئين سيڙپڪاري پڻ تيزي سان پاڪستان اچي رهي آهي، اهي تبديليون اسان جي اقتصادي مستقبل جي لاءِ نيڪ فال جي حيثيت رکن ٿيون جن سان واضح ٿئي ٿو ته پاڪستان جي لاءِ نون امڪانن جا دروازا کلي رهيا آهن. صدر چيو ته مون کي خوشي آهي ته جمهوريت بابت گڏيل اتفاق راءِ جا پڻ مثبت اثر سامهون اچي رهيا آهن، ان کي وڌيڪ ثمرن وارو ۽ فائديمند بڻائڻ جي لاءِ ضروري آهي ته اسان سڌارن جو عمل پنهنجي ذات، پنهنجي گهر، پنهنجي گروهه، طبقي ۽ مڪتبه فڪر سان شروع ڪريون ته جيئن رياستي، حڪومتي ۽ انتظامي سطح تي استعمال ۾ آڻيندڙ قدر اسان جي دل ۽ دماغ جو حصو بڻجي حقيقي تبديلي جو ذريعو بڻجي وڃن. هن چيو ته اچو! پنهنجي ۽ ايندڙ نسل جي مستقبل جي تحفظ جي لاءِ هڪ ٿي پاڪستان جي بانين جي نقش قدم تي هلندي اونداهين جو خاتمو آڻيون ۽ روشنين کي پنهنجو مقدربڻايون.