اسلام آباد (پاکستان نیوزپوائنٹ 31مئ2017ء) صدر ممنون حسين چيو آهي ته ڪشمير ۾ انساني حقن جي سنگين خلاف ورزي ٿي رهي آهي جنهن جو عالمي دنيا ۽ انساني حقن جي تنظيمن کي نوٽيس وٺڻ گهرجي. اها ڳالهه هن ڪالهه اربع ڏينهن ڀارت جي لاءِ پاڪستان جي نامزد هاءِ ڪمشنر سهيل محمود سان ڳالهائيندي ڪئي. ايوان صدر پاران جاري بيان موجب صدر چيو ته ڪشمير ۾ ڀارتي ظلمن کان سفارتي برادري کي موثر انداز ۾ آگاهه ڪيو وڃي. هن چيو ته دنيا والاريل ڪشمير جي صورتحال کان آگاهه ٿي رهي آهي پر ان معاملي کي اڃا وڌيڪ اجاگر ڪرڻ جي ضرورت آهي. صدر اميد ظاهر ڪئي ته عالمي سياست ۾ تمام جلد مثبت تبديلين جا امڪان آهن جنهن سان ڪشمير ۽ فلسطين جو مسئلو اتان جي عوام جي خواهشن موجب حل ٿيڻ جي اميد آهي. صدر چيو ته پاڪستان خطي ۾ امن جي لاءِ ڀارت سميت سمورن پاڙيسري ملڪن سان برابري جي سطح تي دوستاڻن لاڳاپن جو خواهشمند آهي. هن چيو ته خطي ۾ امن، سييڪورٽي ۽ معاشي ترقي جي لاءِ ضروري آهي ته ٻنهي ملڪن جي وچ ۾ دوستاڻا لاڳاپا قائم ٿين. هن وڌيڪ چيو ته اسان سمورن مسئلن کي ڳالهين ذريعي حل ڪرڻ چاهيون ٿا جن ۾ ڪشمير جو مسئلو سرفهرست آهي. هن چيو ته ڀارت گڏيل قومن جي قراردادن کي نظرانداز ڪري رهيو آهي جنهن سان مسئلا وڌي رهيا آهن. صدر چيو ته ڀارتي جاسوس پاڪستاني سرزمين تي دهشتگردي کي هوا ڏيڻ ۾ ملوث هو جيڪو مذمت جوڳو آهي. هن نامزد هاءِ ڪمشنر کي هدايت ڪئي ته هو پاڪستان جي موقف ۽ خدشن کان عالمي برادري کي آگاهه ڪري. صدر هدايت ڪئي ته نامزد هاءِ ڪمشنر پاڻي جي مسئلي تي پاڪستان جي موقف کي عالمي سطح تي اجاگر ڪرڻ ۾ پنهنجو ڪردار ادا ڪري.
ڪشمير ۾ انساني حقن جي سنگين خلاف ورزي ٿي رهي آهي، عالمي دنيا ۽ انساني حقن جي تنظيمن کي نوٽيس وٺڻ گهرجي: صدر ممنون حسين
8 سال پھريان
