لندن، پجنگ(پاکستان پوائنٹ نیوز06۔فروری2017ء) برطانوی میڈیا نے دعوا کیتا اے کہ چین دی بدنامی لئی جاپان ولوں برطانوی تھنک ٹینک دی خریداری دے واقعے وچ برطانوی بحریا دا سابق چیف ملوث اے، برطانوی تھنک ٹینک ’دی ہنری جیکسن‘ دی سوسائٹی نے چین مخالف پروپیگنڈا مہم وچ حصہ لیا تے بحیرا جنوبی چین دے مسئلے اُتے چین اُتے الزام لان والے مضمون اُتے دستخط کیتے۔
چائنہ ریڈیو انٹرنیشنل دے مطابق برطانوی اخبار سنڈے ٹائمز نے اپنی رپورٹ وچ انکشاف کیتا اے کہ برطانوی بحریا دے سابق چیف آف سٹاف لارڈ ویسٹ نے انتہائی سَجھ پکھی برطانوی تھنک ٹینک دی ہنری جیکسن سوسائٹی ولوں چین مخالف پروپیگنڈا وچ حصہ لیا اے۔ اوہنے جنوبی چین دے سمندر دے مسئلے اُتے چین اُتے الزام لان والے مضمون اُتے دستخط کیتے نیں، ایس توں پہلے اطلاع سی کہ برطانیا وچ جاپان دا سفارت خانا ہر مہینے دی ہنری جیکسن سوسائٹی نوں دس ہزار پاﺅنڈ دیندا اے تاں جے برطانیا وچ چین بارے خطریاں نوں ودھوتری ملے۔
لارڈ ویسٹ جو ’دی ہنری جیکسن سوسائٹی‘ دی مشاورتی کمیٹی دا ممبر اے اوہنے آکھیا کہ جنوبی چین دے سمندر بارے مضمون دا مڈھلا مسودا دی ہنری جیکسن سوسائٹی نے لکھیا اے۔ چھاپن توں پہلے اوہنے مضمون دے کُجھ مواد دی ترمیم وی کیتی اے۔ اوہناں دا کہنا اے کہ اوس ویلے اوہنوں پتا نہیں سی کہ جاپان نے دی ہنری جیکسن سوسائٹی نوں مُل لے لیا اے۔ ایس واقعے نوں روس تے بھارت سنے ہور ملکاں دے اخباراں وچ کوریج دِتی گئی اے پر جاپانی ابلاغ وسیلے ایس خبر اُتے چُپ وکھالی دے رہے نیں۔
