پجنگ(پاکستان پوائنٹ نیوز21۔جنوری2017ء) چین نے ’تیز تلوار‘ دے ناں توں اک ڈرون تیار کیتا اے، جو 4000پونڈ بھاری بم چُک کے وادھو تیل بھرے بغیر دو دن تک لگاتار اُڈسکے گا۔ امریکی سائنسی رسالے دے مطابق ’تیز تلوار‘ نوں چین وچ سائنس و ٹیکنالوجی دے پروگرام وچ دوجا انعام دِتا گیا اے تے ایہ اپنی نوعیت دا واحد اسلحہ بردار ڈرون اے جو نیٹو دی بجائے کسے اک ملک نے تیار کیتا اے۔
چینی حکام ایہنوں 2019توں 2020تک اپنی ورتوں وچ لیانا چاہندے نیں تاں جے غیر ملکی بحری جہازاں دی جاسوسی تے اپنے علاقے دی نگرانی لئی ورتیا جا سکے۔ تیز تلوار دی دوجی اہم خاصیت اوہدا ’اسٹیلتھ‘ ہوندا اے یعنی ایہ ریڈار اُتے نظر نہیں آﺅندا، ایہنوں ایوی ایشن انڈسٹری کارپوریشن آف چائنا نے بنایا اے تے اوہدے پراں دے سَجھے تے کھبے پاسے بم رکھن دی تھاں بنائی گئی اے۔
جہاز دی لمبائی 33فٹ تے پراں دا گھیرا 46فٹ اے۔ اوہدی پہلی آزمائشی اُڈان نومبر 2017وچ ہون دی امید اے۔ ویکھن وچ ایہ امریکی بی ٹی دا نِکا ماڈل تے امریکی ایکس 47بی بمبار جہیا وکھالی دیندا اے۔ ایس ہوائی جہاز وچ ہور بہتری لیا کے ایہنوں اہم ٹارگٹس نوں نشانا بنان توں وکھ ہور جہازاں نوں تیل فراہم کرن دے قابل وی بنایا جائے گا۔ اک وار پوری طرحاں تیل بھر جان مگروں ایہ دو دن تک لگاتار اُڈان بھر سکدا اے جدکہ ایس دوران ایہ 24000ہزار کلو میٹر توں زیادا دا پندھ طے کر سکے گا۔
