استنبول(پاکستان پوائنٹ نیوز19۔جنوری2017ء) ترکی دے شہر استنبول وچ نویں سال دے جشن لئی منعقد کیتی گئی اک تقریب اُتے فائرنگ کر کے 39بندیاں نوں قتل کرن والے مرکزی ملزم نے تفتیش دوران کئی اہم انکشافات کیتے نیں۔ مرکزی ملزم دا کہنا اے کہ استنبول وچ نائٹ کلب اُتے حملے لئی اوہنوں ہدایتاں براہ راست شام دے شہر الرقہ توں داعش دی قیادت ولوں ملدیاں رہیاں نیں۔
غیر ملکی خبر رساں ادارے دے مطابق دہشت گرد نے ترک پولیس نوں دسیا کہ نائٹ کلب اُتے حملے د امنصوبا بعدوں بنایا۔ داعش ولوں اوہنوں ہدایت کیتی گئی سی کہ نویں سال اُتے استنبول دے بھیڑ والے علاقے تقسیم سکوائر وچ سیاحاں نوں نشانا بنایا جائے پر فول پروف سکیورٹی دی وجہ توں اوتھے حملا ممکن نہ ہو سکیا۔ اوہدے مگروں نشانا بدل کے رینا ہوٹل وچ قائم اک نائٹ کلب نوں نشانا بنان دی ہدایت کیتی گئی۔
پچھلے دِنا ای استنبول توں گرفتار کیتے گئے ازبکی دہشت گرد عبدالقادر المشہور ابو محمد الخراسانی نے ترک پولیس نوں دسیا کہ تقسیم سکوائر اُتے حملا داعش دی ترجیح سی پر سکیورٹی دی وجہ توں اوتھے حملا نہ کیتا جا سکیا۔مشاربوف نے پولیس نوں دسیا کہ میں آپ تقسیم سکوائر گیا تے اوتھوں تصویر الرقہ وچ اک داعشی نوں گھلی۔ ترک ابلاغ وسیلیاں وچ وی اک فوٹیج چلائی گئی اے جہدے وچ مشار بوف نوں تقسیم سکوائر وچ ویڈیو بناندے وکھایا گیا۔
