جدہ(پاکستان پوائنٹ نیوز04۔جنوری2017ء) سعودی عرب دے ائر پورٹس اُتے ہُن سوانیاں فرنٹ ڈیسکاں اُتے کم کردیاں نظر آن گیاں۔ تفصیل دے مطابق سعودی عرب دے ائر پورٹس دے فرنٹ ڈیسکاں اُتے ہن سوانیاں وی کم کردیاں نظر آن گیاں۔ سعودی حکومت دے ویژن 2030دے اعلان دے بعد سعودی سوانیاں نوں کئی شعبیاں وچ کم کرن لئی موقعے دِتے جا رہے نیں۔ ایس شعبے وچ کم کرن والیاں سوانیاں نال ’المدینہ‘ اخبار نے اُچیچی گل بات کیتی، ایس دوران سوانیاں توں ائر پورٹ دے فرنٹ ڈیسکاں اُتے کم کرن دے تجربے بارے پُچھیا گیا۔
سعودی سوانی اسرار مشی دا کہنا سی کہ مینوں فخر اے کہ میں سعودی سوانیاں دے ایس پہلے گروپ وچ شامل آں جہناں نوں ایس شعبے وچ کم کرن دا موقع ملیا۔ اوہدا کہنا سی کہ ساڈے لئی ایس شعبے وچ اپنیاں صلاحتاں نوں بہتر طریقے نال وکھانا اک چیلنج توں گھٹ نہیں اے، میں اللہ تعالی دا شکر ادا کرن دے نال نال گلف ائر لائز دا شکریا ادا کرنی آں جہناں مینوں ایس شعبے وچ کم کرن دا موقع دِتا۔
گلف ائر دے سی ای او سامر عبدل السلام دا کہنا سی کہ اوہناں نے سعودی عرب وچ سوانیاں نوں ایس شعبے وچ لیان لئی اقدامات کرنے شروع کر دِتے نیں۔ اوہناں دا کہنا سی کہ اجے صرف پہلے مرحلے وچ 10سوانیاں نوں بھرتی کیتا گیا اے، سال دے آخیر تیکر ایہناں دی گنتی وچ وادھا وی کیتا جائے گا۔ اوہناں دا کہنا سی کہ سوانیاں نوں بااختیار بنانا کمپنی دا وڈا مقصد اے۔
