برلن(پاکستان پوائنٹ نیوز20۔دسمبر2016ء) جرمن میڈیا نے دعوا کیتا اے کہ برلن وچ کرسمس دی خریداری لئی لگی مارکیٹ وچ ٹرک بھیڑ اُتے چڑھان والا ڈرائیور افغان یاں پاکستانی شہریت دا پناہ گزین اے۔ جرمنی خبر رساں ایجنسی ’ڈی پی اے‘ دے مطابق جرمنی دے دارالحکومت برلن وچ پچھلے دیہاڑے کرسمس دی خریداری لئی لگی اک مارکیٹ وچ ٹرک دی ٹکر نال 12 بندے ہلاک تے 45زخمی ہو گئے جدکہ پولیس دہشت گردی دے حوالے نال ایس واقعے دیاں تحقیقات کر رہی اے۔
ڈی پی اے نے سکیورٹی وسیلیاں دے حوالے نال دسیا کہ ٹرک ڈرائیور افغان یاں پاکستانی پناہ گزین اے۔ اطلاع دے مطابق ڈرائیور فروری وچ جرمنی آیا سی۔ میڈیا دے مطابق ٹرک ڈرائیور نِکے موٹے جرماں دے حوالے نال پہلے وی پھڑیا گیا سی پر پولیس ایہنوں دہشت گردی دے حوالے نال نہیں جاندی سی۔ جرمنی دے سیاستداناں نے ایس واقعے دے فوری بعد ایہنوں دہشت گردی قرار دین توں پرہیز کیتا پر وزیر داخلا نے اے آر ڈی ٹی وی نوں دسیا کہ بہت سارے ثبوت دہشت گردی دی نشان کاری کر رہے نیں۔
جرمنی دی چانسلر انجیلا میرکل دے ترجمان دا کہنا اے کہ میرکل وزارت داخلا نال مسلسل رابطے وچ اے جدکہ جرمن صدر یو آخم گوک نے ایس موقعے اُتے آکھیا اے کہ ایہ شام برلن تے ساڈے ملک لئی انتہائی بری اے تے ایہدے توں میرے سنے بہت سارے لوک پریشان نیں۔
