واشنگٹن(پاکستان پوائنٹ نیوز17۔دسمبر2016ء) امریکی صدارتی الیکشن دی ووٹنگ میشیناں دی ویکھ بھال کرن والی کمپنی آپ ہیک ہو گئی جدکہ ہیلری کلنٹن دا کہنا اے کہ صدارتی الیکشن وچ اوہناں دی ہار دے ذمے وار ایف بی آئی ڈائریکٹر جیمز کومے تے روس ہیکرز نیں۔ غیر ملکی میڈیا دے مطابق امریکی سکیورٹی کمپنی دے حکام نے دسیا کہ 8نومبر دے صدارتی الیکشن دے بعد روسی ہیکرز صدارتی ووٹنگ مشیناں دی ویکھ بھال کرن والی کمپنی دے کمپیوٹرز وچ وڑے تے الیکشن بارے معلومات چوری کرن دی کوشش کیتی۔
خفیہ ایجنسی دے اہلکارںنے اپنے آپ نوں معلومات مُل لین والا شو کیتا تے روسی زبان بولن والے ہیکرز توں پُچھیا کہ اوہ کیہ چاہندے نیں۔ ہیکرز نے آکھیا کہ اوہ امریکی الیکشن کمیشن تیکر پہنچ چاہند ےنیں۔ ایجنٹاں نے مشیناں دی ویکھ بھال کرن والی کمپنی دے پاسورڈز تے ہور معلومات دےن دی پیشکش کیتی تے روسی ہیکرز نے آکھیا کہ ایہ معلومات اوہ پہلے ای لے چکے نیں۔
اودھر صدارتی الیکشن ہارن والی ہیلری کلنٹن نے نیویارک وچ اک تقریب نال خطاب وچ آکھیا کہ ایف بی آئی ڈائریکٹر جمز کومے نے صدارتی الیکشن توں پہلے ای میلز سرور بارے لکھ کے بہت نقصان پہنچایا جدکہ روسی ہیکرز نے ہیکنگ دے ذریعے ٹرمپ نوں فائدا پہنچایا۔ ہیلری کلنٹن دا کہنا سی کہ 5ورھے پہلے 2011وچ وزیر خارجا دے طور اُتے اوہناں نے روستی پارلیمانی الیکشن وچ دھاندلی دا ذکر کیتا سی تے ایسے گل نوں دل وچ رکھدے ہوئیاں روسی صدر پیوٹن نے ساڈے انتخابی عمل تے ساڈی جمہوریت خلاف خفیہ سائبر حملیاں دی ہدایت دِتی۔
ہیلری کلنٹن دا کہنا سی کہ صدر پیوٹن نے اوس ویلے وی لوکائی نوں غصہ دوان لئی مینوں مجرم ٹھہرایا سی تے امریکی انتخابات وچ جو کُجھ وی اوہناں نے کیتا اوہدا براہ راست تعلق اوہدے نال اے۔ اوہناں دا کہنا سی کہ پیوٹن دا ایہ حملا صرف میرا ذاتی مسئلا نہیں بلکہ ایہ ساڈے ملک خلاف سازش اے۔ ایس معاملے دیاں تحقیقات کیتیاں جانیاں چاہیدیاں۔
