واشنگٹن(پاکستان پوائنٹ نیوز09۔دسمبر2016ء) افغانستان وچ امریکی تے نیٹو فوجیاں دے کمانڈر جنرل جان نکولسن نے خبردار کردے ہوئے آکھیا اے کہ دنیا بھر وچ دہشت گرد گروپاں دی وڈی گنتی پاک افغان خطے وچ اے، چالو ورھے افغانستان وچ امریکی فوج نے سابق وزیر اعظم پاکستان یوسف رضا گیلانی دے پُتر علی حیدر گیلانی نوں عسکریت پسنداں توں رہا کروایا تے پشاور دے آرمی پبلک سکول (اے پی ایس) اُتے 16 دسمبر 2014نوں ہون والے حملیاں وچ ملوث ملزماں نوں ہلاک کرن ورگیاں کامیابیاں حاصل کیتیاں،دنیا بھر وچ 98دہشت گروپ موجود نیں جہناں وچوں 20گروپاں دا تعلق پاک افغان خطے توں اے، ایہ آنکڑے دنیا بھر وچ دہشت گرد گروپاں دی وڈی گنتی دی نمائندگی نوں بیان کردے نیں۔
غیر ملکی خبر رساں ادارے دے مطابق امریکی محکما دفاع پینٹا گون وچ سالانا جائزے اُتے بریفنگ دیندے ہوئے جنرل نکولسن نے آکھیا کہ خطے وچ موجود 20دہشت گرد گروپاں وچوں 13افغانستان جدکہ 7گروپ پاکستان وچ موجود نیں، ایہناں وچ زیادا تر گروپ سانجھیاں کارروائیاں کرن دی وجہ توں خطرناک ترین بن چکے نیں۔ جنرل نکولسن نے مثال دیندے ہوئے آکھیا کہ اسلامک سٹیٹ آف خراسان دی تشکیل کالعدم تحریک طالبان پاکستان (ٹی ٹی پی) اسلامک موومنٹ آف ازبکستان تے افغان طالبان دے کُجھ سابق ارکان نے رلکے کیتی۔
اوہناں نے اپنی بریفنگ وچ ہور دسیا کہ سال 2016وچ امریکی فوج دے محکما انسداد دہشت گردی نے القاعدہ تے داعش خلاف 350آپریشن کیتے جدکہ ہور گروپاں خلاف وی درجناں دے حساب نال آپریشن کیتے گئے۔ جنرل جان نکولسن دے مطابق امریکی فوج نے آپریشنز دے دوران القاعدہ برصغیر دے 50رہنماواں نوں ہلاک تے گرفتا رکیتا جدکہ القاعدہ تے اسلامک سٹیٹ (داعش) دے وی 200کمانڈرز نوں ہلاک تے گرفتار کیتا گیا۔
جنرل نکولسن نے ہور دسیا کہ امریکی انسداد دہشت گردی فورس نے مشرقی افغانستان وچ کارروائی کر کے سابق وزیر اعظم یوسف رضا گیلانی دے پُتر نوں رہا کراندے ہوئے 5امیراں سنے 20دہشت گرداں نوں ہلاک کیتا، آپریشن وچ اسلامک جہاد یونین دے امیر حامد اللہ تے طارق گیڈر گروپ دے امیر عمر خلیفہ نوں وی ہلاک کیتا گیا۔ جنرل نکولسن نے پینٹا گون نوں دسیا کہ چالو ورھے 23اکتوبر نوں امریکی فوج نے مشرقی افغانستان وچ کارروائی کر کے القاعدہ اسلامک سٹیٹ دے امیر فاروق القطری نوں ہلاک کیتا جو قطری القاعدہ اسلامک سٹیٹ دے بیرونی آپریشنز دے ڈائریکٹر سن جدکہ قطری تے اوہدے ساتھی امریکا وچ دہشت گرد حملیاں دی منصوبا بندی وچ وی ملوث سن۔
امریکی فوج دے سربراہ نے دسیا کہ امریکی فوجیاں نے آپریشنز دے ذریعے ملا منصور نوں وی ہلاک کیتا۔ جنرل جان نکولسن نے آکھیا کہ وزیر اعظم نواز شریف تے نویں چُنے گئے امریکی صدر ڈونلڈ ٹرمپ وچکار ٹیلی فونک رابطے اُتے کجھ نہیں کہنا چاہند ے پر اوہ پاکستان دے نویں آرمی چیف جنرل قمر جاوید باجوہ نال ملاقات بارے سوچ رہے نیں، اوہ چالو ہفتے واپسی اُتے جنرل قمر باجوہ نال ملن گے۔
جنرل نکولسن نے ایہ وی دسیا کہ دہشت گردی خلاف تے سرحد اُتے صورتحال بہتر بنان سنے کئی معاملات پاکستان تے امریکا وچکار سانجھے نیں تے اوہناں اُتے رلکے کم کرن بارے سوچیا جا رہیا اے۔ اک سوال دے جواب وچ جنرل نکولسن دا کہنا سی کہ حقانی نیٹ ورک اجے تیکر امریکا، اوہدے اتحادیاں تے افغانستان لئی سبھ توںوڈا خطرا اے۔ جنرل جان نکولسن نے آکھیا کہ حقانی نیٹ ورک کول ایس ویلے وی 5امریکی شہری یرغمال نیں تے اوہنے پاکستان وچ محفوظ ٹھکانے قائم کیتے ہوئے نیں۔
