واشنگٹن(پاکستان پوائنٹ نیوز02۔دسمبر2016ء) وائٹ ہاﺅس دے ترجمان جوش ارنسٹ نے آکھیا اے کہ پاکستان تے امریکا وچکار تعلقات ڈاڈھے پیچیدا نیں تے ایہو وجہ اے کہ امریکی صدر بارک اوباما خاہش دے مگروں وی پاکستان دا دورا نہیں کر سکے، نواز شریف تے ڈونلڈ ٹرمپ وچ گل بات بارے اعلامیے دی درستگی تے لہجے اُتے ردعمل نہیں د ے سکدے، معاملے دی وضاحت لئی نویں چُنے گئے صدر دی ٹیم نال گل بات کیتی جائے۔
تفصیل دے مطابق واشنگٹن وچ میڈیا نوں بریفنگ دیندے ہوئے ترجمان وائٹ ہاﺅس جوش ارنسٹ دا کہنا سی کہ قومی سلامتی دے حوالے نال پاکستان تے امریکا دے تعلقات ڈاڈھے پیچیدا نیں، پچھلے 8ورھیاں وچ خاص کر القاعدہ دے سابق سربراہ اسامہ بن لادن دی پاکستان وچ موت دے بعد دوویں ملکاں دے تعلقات خراب رہے نیں۔ اوہناں دا کہنا سی کہ صدر اوباما پاکستان دا دورا کرنا چاہندے سن پر دوویں ملکاں دے پیچیدا تعلقات پاروں انج نہ ہو سکیا۔
جوش ارنسٹ نے آکھیا کہ نویں چُنے گئے امریکی صدر ڈونلڈ ٹرمپ عہدا سنبھالن دے بعدمختلف ملکاں دا دورا کرن بارے سوچن گے تے یقینی طور اُتے ایہناں ملکاں وچ پاکستان وی شامل ہووے گا۔ ترجمان وائٹ ہاﺅس دا کہنا سی کہ ڈونلڈ ٹرمپ تے وزیراعظم نواز شریف دی گل بات بارے حکومت پاکستان دا اعلامیا پڑھیا اے پر اوہدے ٹھیک یاں غلط ہون بارے کوئی رائے نہیں دے سکدا۔ وائٹ ہاﺅس دے ترجمان دا کہنا اے کہ امریکی صدر ڈونلڈ ٹرمپ نے عہدا سنبھالن دے بعد جدوں بیرون ملکاں دے دوریاں دا آغاز کیتا تے پاکستان اوہناں ملکاں وچ ضرور شامل ہووے گا۔ اوہناں دا کہنا سی کہ ڈونلڈ ٹرمپ بارے اعلامیے دی درستگی اُتے ردعمل نہیں دے سکدے، معاملے دی وضاحت لئی نویں چُنے گئے صدر دی ٹیم نال گل بات کیتی جائے۔
