قاہرہ(پاکستان پوائنٹ نیوز22۔نومبر۔2016ء) مصر دی عدالت نے سابق معزول کیتے جان والے صدر محمد مرسی دی عمر قید دی سزا کالعدم قرار دے دِتی اے۔ عدالت نے فلسطینی تنظیم حماس نال رلکے جاسوسی کرن دے الزام وچ اخوان المسلمین دے رہنما محمد مرسی خلاف مقدما دوبار اچلان دا حکم دِتا۔ ایس طرحاں دے ہور مقدمیاں وچ لَمی قید کٹن پاروں مرسی دی رہائی اجے ممکن نہیں۔
تفصیل دے مطابق سابق صدر محمد مرسی نوں فلسطین دی تنظیم حماس تے لبنانی تنظیم حزب اللہ لئی جاسوسی دے الزاماں دے تحت پچھلے ورھے جون وچ عمر قید دی سزا سنائی گئی سی۔مصری عدالت نے 2005 تے 2013وچ حساس دستاویزات نوں ملکوں باہر پہنچان دے الزام وچ ہور 16بندیاں دی سزائے موت نوں وی برقرار رکھیا سی۔ یاد رہوے کہ پچھلے ہفتے عدالت نے محمد مرسی دی سزائے موت نوں وی کالعدم قرار دے کے دوبارا مقدما چلان دا حکم دِتا سی۔
محمد مرسی نوں مئی 2015وچ اپنی حکومت دے خاتمے دے بعد جیل توڑن دے الزام اُتے موت دی سزا سنائی گئی سی۔ مصری عدالت نے محمد مرسی دے 100توں ودھ اخوان المسلمین دے ساتھیاں نوں وی سزائے موت سنائی سی۔ محمد مرسی سنے اخوان المسلمین دے دوجے ارکان اُتے الزام سی کہ اوہناں نے 2011وچ حماس، حزب اللہ تے مقامی جنگجوواں نال رلکے جیل توڑن دی سازش کیتی سی تے جیل اُتے حملے دے بعد محمد مرسی سنے جماعت دے 34لیڈر فرار ہو گئے سن۔
ایس توں پہلے اپریل 2015وچ مصر دی اک عدالت نے سابق صدر محمد مرسی نوں 2012وچ وکھالویاں اُتے تشدد تے گرفتار کرن دے الزام وچ 20 سال قید دی سزا سنائی سی۔ یاد رہوے کہ حسنی مبارک دے دور اقتدار دے خاتمے دے بعد 2011وچ مصر دے پہلے آزادانا طور اُتے چُنے گئے صدر محمد مرسی نوں اقتدار دے صرف اک سال بعد ای استعفے دے مطالبے دا ساہمنا کرنا پیا سی۔ جہدے بعد جولائی 2013وچ ایس ویلے آرمی چیف تے موجودا صدر عبدالفتح السلیسی نے اوہناں دی حکومت دا پاسا اُلٹا دِتا سی۔ مرسی دی جماعت اخوان المسلمین خلاف موجودا فوجی حکومت ولوں کارروائیاں دا سلسلا وی جاری اے تے ایس جماعت نوں بلیک لسٹ کیتا گیا اے۔
