ملائیشیا(پاکستان پوائنٹ نیوز28۔نومبر۔2018ء) 25سال دی سابق روسی ملکہ حسن نے 49سال دے ملائیشین بادشاہ نال ویاہ کر لیا۔ برطانوی رسالے’ڈیلی میل‘ دی رپورٹ دے مطابق روس دی 25ورھیاں دی سابق ملکہ حسن اوکسانا ویوہڈبنا نے ملائیشیا دے 49سال دے بادشاہ تینگکو محمد فارس پترا نال ویاہ کر لیا اے۔ دوناں دا ویاہ 22نومبر نوں روس دی راجدھانی ماسکو وچ ہویا۔
ویاہ دی تقریب وچ شاہی پروہنیاں سنے لاڑی تے لاڑے دے بیلی یاراں رلتی ہوئے۔ ویاہ دی تقریب وچ ملائیشین بادشاہ نے نیلے رنگ دا روایتی سوٹ پایا۔ جدکہ لاڑی نے چِٹے رنگ دے کپڑے پائے۔ یاد رہوے کہ ماسکو دی سابق ملکہ حسن نے بادشاہ نال ویاہ کرن توں پہلاں اسلام قبول کیتا ، جیہدے مگروں اوہنے اپنا ناں ریحانہ رکھیا۔ ریحانہ نے 2015وچ ’مس ماسکو‘ دا اعزاز اپنے ناں کیتا اے جیہدے مگروں اوہنے چین تے تھائی لینڈ وچ بطور ماڈل کم کیتا۔ رپورٹس دے مطابق اسلام قبول کرن تے ملائیشین بادشاہ نال ویاہ کرن مگروں ریحانہ نے حجاب کرنا شروع کردتا اے۔
