واشنگٹن(پاکستان پوائنٹ نیوز26۔نومبر۔2018ء) امریکا نے آکھیا اے کہ اوہ خطے وچ دہشت گردی دے خطرے نال نبڑن لئی پاکستان نال تعاون دا خاہشمند اے۔ غیر ملکی خبر رساں ادارے دے مطابق امریکی سٹیٹ ڈیپارٹمنٹ نے اپنے بیان وچ کراچی وچ چینی قونصلیٹ تے اورکزئی وچ دہشت گرد حملیاں اُتے پاکستان دے فوری جواب تے بہادری دی تعریف کیتی۔ امریکی سٹیٹ ڈیپارٹمنٹ دی ترجمان ہیتھر نوئرٹ نے پاکستان نوں یقین دوایا کہ امریکا ایہناں دہشت گردی دے واقعیاں دا مقابلا کرن وچ پاکستانی لوکائی نال کھلوتا اے تے اوہ خطے وچ ایہناں خطریاں نال نبڑن لئی پاکستانی حکومت دے تعاون دے موقعے لبھن دا عمل جاری رکھے گا۔
اوہناں نے آکھیا کہ امریکا حملیاں دی مذمت کردا اے۔ تے متاثرین دے خانداناں نال دُکھ دا اظہار کردا اے۔ ترجمان نے ہور آکھیا کہ اسیں پاکستانی سکیورٹی فورسز دی وی تعریف کرنے آں، جیہناں نے چینی قونصلیٹ اُتے حملے دا فوری تے بہادری نال جواب دتا تے انسانی جاناں دے ہور نقصان نوں روکیا۔
