نویں دِلی(پاکستان پوائنٹ نیوز23۔نومبر۔2018ء) بے روزگار بھارتی شہری نے 9بالاں نوں جنسی زیادتی دا نشانہ بنان مگروں قتل کرن دا اعتراف کرلیا۔ تفصیل دے مطابق 20ورھیاں د ے بھارتی شہری نے اعترافی بیان وچ دسیا کہ اوہنے 3تے 7سال دیاں عمراں دیاں گھٹو گھٹو 9بالڑیاں نوں نویں دِلی تے ہور تن شہراں وچ اپنی جنسی ہوس دا نشانہ بنان مگروں قتل کر دتا۔ ذکر کیتے گئے ملزم نوں بالاں دے گواچن دے کیس وچ گرفتار کیتا گیا جیہدے وچ اوہنے اپنے ایس جرم نوں قبولیا۔
ایس حوالے نال سب انسپکٹر سوبھاش بوکن نے دسیا کہ ملزم بالاں نوں اغوا کرن مگروں سبھ توں پہلاں اوہناں دیاں لَتاں توڑدا، اوہناں نوں جنسی ہوس دا نشانہ بناندا تے فیر قتل کر دیندا سی۔ پولیس دا آکھنا اے کہ ملزم نوں گرفتار کر کے عدالت وچ پیش کیتا گیا جتھے اوہدا 8دناں دا جسمانی ریمانڈ لیا گیا۔پولیس دے مطابق ملزم نے اجے تیکر کسے وکیل نال رابطہ نہیں کیتا۔
پولیس نے مجرم دے بیان اُتے تن بالڑیاں دے اغوا دے کیساں دیاں تحقیقات شروع کر دتیاں نیں جدکہ ہور کیساں دے حوالے نال وی تفتیش جاری اے۔ انج دے چار کیس نویں دِلی، تن کیس گورو گرم تے اک اک کیس بھارت دے ہور شمالی علاقیاں وچ رپورٹ ہوئے۔ مجرم دا آکھنا اے کہ میں بے روزگار آں پر کدی کدی دیہاڑی اُتے مزدوری کرنا ساں۔ مجرم دا نشانہ بُہتیاں انج دیاں تھاواں ہوندیاں سن جتھے مفت روٹی ونڈی جاندی سی۔ انج دیاں تھاواں اُتے آن والیاں بالڑں نوں مجرم ٹافیاں یاں مٹھیائی دا لالچ دے کے اپنے ول متوجہ کردا تے اوہناں نوں اغوا کر لیندا سی۔
