متحدہ عرب امارات(پاکستان پوائنٹ نیوز22۔نومبر۔2018ء) متحدہ عرب امارات وچ اک مراکش سوانی نے بوائے فرینڈ نوں قتل کر کے اوہدی لاش دے ٹُکڑے کیتے تے بریانی بنا کے پاکستانی ملازماں نوں کھوا دتی۔ تفصیل دے مطابق مراکش سوانی نے تن مہینے پہلاں اپنے بوائے فرینڈ دا قتل کیتا سی پر ایہ گل اودوں ساہمنے آئی جدوں ملزمہ دے بلینڈر وچوں انسانی دند برآمد ہویا۔
مقامی اخبار دے مطابق بلینڈر توں انسانی دند برآمد ہون مگروں ملزمہ نے پولیس ساہمنے اپنے ہولناک جرم دا اعتراف کیتا تے دسیا کہ اوہ غصے وچ جنونی ہوگئی سی جیہدی وجہ توں ایہ سبھ کیتا۔ ایس کیس دیاں تحقیقات جاری نیں جدکہ ملزمہ نوں عدالت وچ پیش کر کے اوہدا ٹرائل کیتا جائے گا۔ مقامی اخبار وچ دسیا گیا کہ ملزمہ دا پچھلے ست ورھیاں توں اپنے مقتول بوائے فرینڈ نال تعلق سی۔
اک دن مقتول نے ملزمہ نوں دسیا کہ اوہنے چھڈ کے کسے ہور مراکش سوانی نال ویاہ دا فیصلا کرلیا اے۔ پولیس نے اجے تیکر قتل دے طریقہ کار بارے کُجھ نہیں دسیا۔ پولیس دا آکھنا اے کہ ملزمہ نے اپنے بوائے فرینڈ نوں قتل کر کے اوہدی لاش دے ٹُکڑیاں دی بریانی بنائی تے اپنی گھر نیڑے کم کرن والے پاکستانی ملازماں نوں کھوا دتی۔ ایس واقعے دی کہانی اودوں ساہمنے آئی جدوں مقتول دا بھرا اوہدی تلاش لئی العین اپڑیا۔
جتھے اوہنے بلینڈر وچوں انسانی دند برآمد کیتا۔ مقتول دے بھرا نے پولیس نوں اپنے بھرا دے گواچن دی اطلاع دتی جیہناں نے برآمد ہون والے دند دا ڈی این اے ٹیسٹ کروایا جیہدے توں ایہ گل دی تصدیق ہوگئی کہ ایہ دند متقول دا ای اے۔اک خلیجی اخبار دے مطابق پولیس دی تفتیش دوران ملزمہ نے اپنا جرم قبول کر لیا۔ ملزمہ نے اپنے بیان وچ آکھیا کہ اوہنے بوائے فرینڈ نوں قتل کرن مگروں اپارٹمنٹ دی صفائی لئی کُجھ دوستاں دی مدد لئی۔ ملزمہ نوں دماغی معائنے لئی ہسپتال گھل دتا گیا اے۔
