اسلام آباد(پاکستان پوائنٹ نیوز19۔نومبر۔2018ء) ایران نے پاکستان وچ دہشت گرداں خلاف آپریشن دی تیار کر لی۔ ایرانی میڈیا دے مطابق بارڈر سکیورٹی دے حوالے نال ہون والی اک کانفرنس وچ ایہ موقف اپنایا گیا کہ گوانڈھی ملکاں وچ دہشت گرداں دی موجودگی تیکر ایران دا بارڈر پوری طرحاں محفوظ نہیں ہو سکدا۔ ایرانی حکام دا آکھنا اے کہ ایس سلسلے وچ دوناں پاسے تعاون دی ضرورت اے۔
ایرانی وزیر داخلا ایبڈولر یزا رحمانی فاضی دا آکھنا اے کہ ایران بارڈر اُتے سکیورٹی نوں ہور سخت تے فول پروف کرن لئی پاکستان نال رلکے اقدامات کرن لئی راضی اے۔ اوہناں نے آکھیا کہ ساڈا مقصد سرحداں نوں دہشت گرداں توں محفوظ بنانا اے۔ اوہناں دا آکھنا سی کہ ایس معاملے وچ پاکستانی حکام نال وی گل بات کیتی جا رہی اے۔ سانوں دہشت گردی دے خاتمے تے ملک دے تحفظ لئی سانجھیاں کوششاں کرنیاں پین گیاں۔
اوہناں نے ہور آکھیا کہ پاکستانی حکومت کسے وجہ توں ساڈا ساتھ نہیں دے سکی تے ایران پاکستان وچ دہشت گرداں خلاف آپریشن لئی پوری طرحاں تیار اے۔ ساڈے کول اینی طاقت ا ے کہ اسیں سرحد پار دہشت گرداں نوں نشانہ بنا سکدے آں۔ ایرانی میڈیا مطابق ایران دے وزیر داخلا نے پاکستان وچ اوہناں کیمپاں ول اشارہ کیتا جو دہشت گرداں دیاں آماجگاہواں نیں تے جیہناں نے ایرانی بارڈر دی سکیورٹی دے اہلکاراں نوں اغوا کرن تے اوہناں نوں مارن دی ذمے واری قبول کیتی۔
