ممبئی(پاکستان پوائنٹ نیوز19۔نومبر۔2018ء) ممبئی حملا کیس وچ ملوث اجمل قصاب دے بھارتی شہری ہون دا انکشاف ہویا اے۔ تفصیل مطابق بھارتی ریاست اُترپردیش دے ضلع اوریا دی تحصیل بدھونا دے ریکارڈ مطابق اجمل قصاب نوں ڈومیسائل جاری کیتا گیا سی۔ واقعے دا نوٹس لین مگروں تحقیقات دوران اوہدا ڈومیسائل رد کیتا گیا۔ تے ایہدیاں تحقیقات دا حکم دین توں پہلاں ای متعلقہ ریونیو افسر نوں وی عہدے توں ہٹا دتا گیا۔
بھارتی افسر پرویندرا کمار نے کیس دی تفتیش دوران ایس گل دی تصدیق کیتی کہ نامعلوم بندیاں ولوں جعلی دستاویزات جمع کروان اُتے اجمل قصاب دا ڈومیسائل جاری کیتا گیا سی۔ اوہناں نے دسیا کہ کُجھ نامعلوم بندیاں نے تحصیل بدھونا وچ دہشت گرد اجمل قصاب دی تصویر نال اکتوبر وچ ڈومیسائل لئی درخاست جمع کروائی ، جیہدے بعد متعلقہ حکام نے دستاویزات تے کوائف دی تصدیق کیتے بغیر ای 21اکتوبر نوں ڈومیسائل جاری کر دتا۔
ذکر کیتے گئے ڈومیسائل وچ اجمل قصاب دی جنم بھوئیں بدھونا تحصیل درج اے۔ ڈومیسائل وچ اجمل قصاب دے والد دا ناں محمد عامر جدکہ والدہ دا ناں ممتاز بیگم درج اے۔ ایس سرٹیفکیٹ دی رجسٹریشن نمبر 181620020060722اے۔ اوہناں دا آکھنا سی کہ ایس سلسلے وچ تحقیقات شروع کر دتیاں نیں۔ بھارتی افسر نے دسیا کہ اسیں دستاویزات دیاں درج معلومات وچ اختلاف اُتے تحصیل آفسر کولوں معلومات دی تصدیق کرن دی کوشش کیتی، جیہدے مگروں سانوں پتا لگا کہ ایہ ڈومیسائل سرٹیفکیٹ جعلی اے۔
