ریاض(پاکستان پوائنٹ نیوز09۔نومبر۔2018ء) سعودی عالم ڈاکٹر سعد الحثلان نے اک ٹی وی پروگرام وچ اپنے خیالاں دا اظہار کردے ہوئے آکھیا اے کہ مرحوم ماں پیو نوں ایصال ثواب اپڑان تے اوہناں نال محبت دے اظہار لئی قبرستان جانا بے سود اے تے انج کرن والیاں نوں زحمت دے سوا کجھ حاصل نہیں ہوئے گا۔ عالم دا آکھنا سی کہ اولاد لئی مناسب عمل ایہ اے کہ اوہ مرحوم ماں پیو نوں کارخیر، عمرہ تے خیرات دی صورت وچ ثواب اپڑائے۔
ڈاکٹر سعد الحثلان ممتاز سعودی علماء اُتے مشتمل بورڈ دے سابق رکن رہ چکے نیں تے ایس ویلے سعودی فقہی انجمن دے چیئرمین نیں۔ اوہناں نے مذہبی پروگرام ’یستفونک‘ وچ ماں پیو دی زیارت لئی قبرستان جان دے حوالے نال شرعی حکم دی وضاحت کیتی۔ پروگرام دوران اوہناں کولوں سوال کیتا گیا کہ ماں پیو دی وفات مگروں اوہناں نال محبت دے اظہار لئی قبرستان جانا اوہناں نال حسن سلوک دے زمرے وچ آؤندا اے یاں نہیں؟جواب وچ اوہناں دا آکھنا سی کہ میرے علم دے مطابق رسول کریم نال اجیہی کوئی صحیح حدیث منقول نہیں اے۔
جیہدے وچ اوہناں نے اولاد نوں ماں پیو دی وفات مگروں اوہناں دی زیارت لئی قبرستان جان دی تعلیم یاں ترغیب دتی ہوئے۔ اوہناں دا آکھنا سی کہ ایس حوالے نال اک ضعیف حدیث موجود اے بلکہ موضوع حدیث اے۔ روایت کیتی جاندی اے کہ رسول اللہ ﷺ دا ارشاد اے کہ ’جس بندے نے میت دی زیارت کیتی تے اوہدی روح اوہدے جسم وچ واپس کر دتی جاندی اے تے اوہ سلام کرن والے دے سلام دا جواب دیندی اے تے زیارت نوں آئے بندے نال اُنسیت محسوس کر دی اے‘۔
پر محدثین دے نیڑے ایہ حدیث اپنے کولوں گھڑی گئی اے۔ بھاویں ایہ حدیث صحیح ہوندی تے صحابہ کرا م وی ایہدے اُتے عمل کردے۔پر ایہدا کوئی ثبوت نہیں لبھدا۔ علامہ نے آکھیا کہ جو میت دفنائی جاندی اے اوہ ویلا لنگھن مگروں مٹی وچ رل جاندی اے۔ اج توں 100یاں ہزار ورھے پہلاں مرن والیاں دیاں لاشاں دی کوئی باقیات نہیں لبھدی۔صرف رب دے کرم نال انبیاء کرام تے صدیق و شہداء دا جسدخاکی زمین نہیں نگلدی۔اوہناں دے سوا سبھ دیاں لاشاں مٹی بن جاندیاں نیں۔
