آؤندے48گھنٹیاں دوران پوری دنیا وچ انٹرنیٹ بند ہون دا خدشہ

نیویارک(پاکستان پوائنٹ نیوز13۔اکتوبر۔2018ء) انٹرنیٹ کارپوریشن آف اسائنڈ نیمز اینڈ نمبرز(آئی سی اے این این) نے آؤندے 48گھنٹیاں دوران عالمی سطح اُتے انٹرنیٹ بند ہون دے خدشے دا اظہار کیتا اے۔ میڈیا رپورٹس مطابق آئی سی اے این این نے آکھیا کہ عالمی انٹرنیٹ نوں معمولی مرمتی کم دی وجہ توں بند کیتا جا سکدا اے۔ انٹرنیٹ ورتن والیاں نوں آؤندے 48گھنٹیاں دوران ویب پیجز اُتے جان تے مالی لین دین وچ اوکڑاں دا ساہمنا کرنا پے سکدا اے۔ آئی سی این این دا آکھنا سی کہ سائبر حملیاں دے ودھدے ہوئے واقعیاں دی وجہ توں ڈھانچے وچ تبدلی دی ضرورت پیش آئی اے۔ ایس مرمتی کم دوران عالمی انٹرنیٹ دا اوہ خفیہ کوڈ بدل دتا جائے گا جو ویب سائٹس دے ڈومین نیمز نوں محفوظ بناندا اے۔