واشنگٹن(پاکستان پوائنٹ نیوز13۔اکتوبر۔2016ء) انٹرنیشنل فوڈ پالیسی ریسرچ انسٹی ٹیوٹ ولوں بھکھ دا شکار ملکاں دی لسٹ جاری کیتی گئی اے جہدے وچ پاکستان 11ویں نمبر اُتے اے۔ ادارے ولوں گلوبل ہنگر انڈیکس 2016 وچ مختلف ملکاں دے لوکاں نوں خوراک دی دستیابی دی صورتحال دے مطابق اوہناں نوں زیرو توں 100 پوائنٹس وچکار ونڈیا گیا اے۔ پاکستان 118ملکاں وچوں 11ویں نمبر اُتے اے، تے ایہدے 33.4 پوائنٹس نیں۔
رپورٹ دے مطابق پاکستان توں وکھ11ملک انج دے نیں جتھے بھکھ دا شکار لوکاں دا تناسب زیادا اے۔ بھارت ایس رپورٹ وچ پاکستان توں بہتر اے۔ دسیا گیا اے کہ دنیا دے کل 70کروڑ95 لکھ بندے بھکھ دا شکار نیں، 2008 وچ پاکستان دے پوائنٹس 35.1 سن جہدے توں پتا چلدا اے کہ ایتھے بھکھ وچ کمی کجھ گھٹ اے پر درجا بندی توں پتا لگدا اے کہ ہن وی غذا دی کمی دا شکار ملکاں وچ پاکستان تشویشناک صورتحال نال دوچار ملکاں وچ شامل اے۔
پاکستان وچ کل آبادی دا 22فیصد غذا دی کمی دا شکار اے تے 8.1فیصد بال 5 سال توں گھٹ عمر وچ ای ایس دنیا توں چلے جاندے نیں ۔پاکستان توں وکھ ایس لسٹ وچ افغانستان دا 8واں جدکہ بھارت دا22واں نمبر اے۔ انڈیا نائجیریا تے انڈونیشیا سنے 43ملک وی تشویشناک کیٹیگری وچ شامل نیں، 2016 دے انڈیکس دے مطابق 7 ملکاں وچ بھکھ دی صورتحال خطرناک حد تیکر پہنچ گئی اے۔
ایہناں وچ صحارا، وسطی افریقا، چاڈ، میڈاگ میڈاگاسکر، سیر الیون تے زمبیا شامل نیں۔ دسیا گیا اے کہ 2000 توں لے کے ہن تیکر بھکھ دی شرح وچ 29 فیصد کمی ہوئی اے تے ایس ویلے صورتحال ایہ اے کہ ترقی پذیر ملک وی غذائی قلت پاروں ڈاڈھے خطریاں نال دو چار نیں۔ رپورٹ دے مطابق13ملک انج دے نیں جہناں دا ڈیٹا اکٹھا نہیں کیتا جا سکیا جدکہ ایہناں وچ 10ملک انج دے ویں نیں جِتھے بھکھ دی صورتحال خطرناک اے ، ایہناں وچ شام، سوڈان تے صومالیہ شامل نیں۔
