مقبوضہ کشمیر(پاکستان پوائنٹ نیوز25۔ستمبر۔2018ء) مقبوضہ کشمیر وچ بھارتی فوج نے ضلع کپواڑہ وچ ہور تن نوجواناں نوں شہید کر دتا۔ جیہدے مگروں پچھلے 24گھنٹیاں دوران شہید ہون والے نوجواناں دی گنتی پنج ہو گئی اے۔ کشمیر میڈیا سروس مطابق تن نوجواناں نوں فوجیاں نے ضلع دے علاقے ٹنگڈار وچ تلاشی تے گھیرے (محاصرے) دی پرتشدد کارروائی دوران شہید کیتا جدکہ دو نوجواناں نوں پچھلے دیہاڑے شہید کیتا گیا سی، جیہدے مگروں شہید ہون والے نوجواناں دی گنتی پنج ہو گئی اے۔
ایس توں پہلاں بھارتی فوج دا اک اہلکار ایسے علاقے وچ اک حملے دوران ہلاک ہو گیا سی۔ بھارتی فوج دا آکھنا اے کہ علاقے وچ کارروائی جاری اے۔ دوجے پاسے بھارتی فوجیاں ہتھوں نوجواناں دے قتل خلاف احتجاج لئی بانڈی پورہ تے پلوامہ دے ضلعیاں وچ مکمل ہڑتال کیتی گئی۔ ساریاں دُکاناں تے تجارتی مرکز بند رہے جدکہ سڑکاں اُتے ٹریفک وی گھٹ رہی۔
