بھارت(پاکستان پوائنٹ نیوز22۔ستمبر۔2018ء) بھارت وچ کئی مذہباں توں تعلق رکھن والے لوک وسدے نیں پر سبھ توں ودھ ایتھے ہندو وسدے نیں جو اپنے عقیدے دے تحت کئی دیوتیاں دی پوجا کردے نیں۔ کئی مندر وچ پئیاں بھگوان دیاں مورتیاں نوں پوجدے نیں تے کوئی اگ، سپ، سورج تے انج دیاں ہور شیواں دی پوجا کردے نیں۔ بھارت وچ اک اجیہا بندہ وی اے جو اپنے کسے بھگوان یاں دیوتا دی پوجا کرن دی بجائے امریکی صدر ڈونلڈ ٹرمپ نوں پوجدا اے۔ جی ہاں!ذکر کیتے گئے بھارتی شہری نے امریکی صدر ڈونلڈ ٹرمپ نوں ای اپنا بھگوان من لیا اے تے روز ڈونلڈ ٹرمپ دی تصویر اپنے گھر وچ بنے نِکے مندر وچ رکھ کے اوہدی آرتی لاہندا تے پوجا کردا اے۔ بوسھا نامی ایہ بندہ پچھلے 3ورھیاں توں ڈونلڈ ٹرمپ دی تصویر پوج رہیا اے۔ بوسھا نے اج تیکر کوئی اک وی دن نہیں چھڈیا کہ اوہنے ڈونلڈ ٹرمپ دی پوجا نہ کیتی ہوئے، ایہو نہیں بلکہ بھارتی شہری نے اپنے کئی گوانڈھیاں نوں وی ڈونلڈ ٹرمپ دی پوجا کرن لئی قائل کرن دی کوشش کیتی۔ تے اوہناں نوں ایس گل اُتے راضی کرن دی کوشش کیتی کہ اوہ وی ایسے طرحاں ڈونلڈ ٹرمپ دے اگے اپنا سر جُھکایا کرن۔ ڈونلڈ ٹرمپ اُتے بوسھا دا عقیدہ ویکھن لائق اے۔ ایسے عقیدے دی وجہ توں بوسھا دے ماں پیو گھر چھڈ کے چلے گئے پر ماں پیو دے گھر چھڈ کے جان نال وی بوسھا نوں کوئی فرق نہیں پیا تے نہ ای اوہدی عبادت وچ کوئی کمی آئی۔ بوسھا دے ماں پیو اوہدے عقیدے اُتے یقین نہیں رکھدے بلکہ اوہنوں کئی وار نفسیاتی ڈاکٹر کول جان دی صلاح وی دے چکے نیں۔ بھارتی شہری دا آکھنا اے کہ میرے گھر والے تے گوانڈھی مینوں سارے پاگل سمجھدے نیں۔ میں اوہناں نوں صاف آکھ دتا اے کہ مینوں کسے نفسیاتی ڈاکٹر کولوں علاج کروان دی لوڑ نہیں اے کیونکہ ڈونلڈ ٹرمپ ای میرے لئی بھگوان اے۔ مینوں ایس شے نال کوئی فرق نہیں پیندا کہ لوک میرے بارے کیہ آکھدے نیں۔ میں ڈونلڈ ٹرمپ نوں اپنا رب مننا واں۔ اوہ میرے دل وچ وسدا اے تے میں اوہنوں بہت پسند کرنا واں ، ایسے وجہ توں اوہدی پوجا کرنا واں۔
