واشنگٹن(پاکستان پوائنٹ نیوز15۔ستمبر۔2018ء) امریکی صدر ڈونلڈ ٹرمپ نے صدر بنن مگروں پنج ہزار جھوٹھ بولن دا ریکارڈ بنا دتا۔ امریکی اخبار وچ صدر ڈونلڈ ٹرمپ خلاف چھپن والے مضمون نے تھر تھلی پا دتی۔ آرٹیکل دے مطابق اقتدار وچ آئے ٹرمپ نوں 601 دن ہو گئے نیں۔ ایس دوران اوہناں نے کئی موقعیاں اُتے پنج ہزار توں ودھ وار جھوٹھ بولیا۔ ڈونلڈ ٹرمپ نے عہدے دا حلف چُکن دے پہلے 100دناں وچ روز4.9فیصد دے حساب نال روز 32وار جھوٹھ بولیا۔
ایہدے وچ اوہناں ولوں جاری ٹویٹ تے بیان وی شامل نیں۔ اپنی انتخابی مہم دوران ووٹ لین لئی وی اوہناں نے جھوٹھ دا سہارا لیا سی۔ اخبار مطابق ٹرمپ نے اک ویلے وچ سبھ توں ودھ جھوٹھ چالو مہینے 7ستمبر نوں امریکی پرچا کاراں نال ملاقات دوران بولے۔ 120منٹ دی ملاقات دوران اوہناں نے 125جھوٹھ بولے جدکہ ایس توں اک دن پہلے ای اوہناں نے ریاست مونٹانا وچ اک جلسے نال خطاب کردے ہوئے 74جھوٹھ بولے سن۔امریکی صدر ڈونلڈ ٹرمپ نے صدارتی الیکشن وچ روس دی مداخلت دا اعتراف کیتا پر روسی صدر پیوٹن نال ملاقات وچ موقف بدل لیا تے آکھیا کہ روس نے مداخلت نہیں کیتی۔ ایہدے اُتے تنقید دا نشانہ بنایا گیا تے اوہناں نے اک وار فیر موقف بدل کے آکھیا کہ روس نے مداخلت کیتی سی۔
