بھارت(پاکستان پوائنٹ نیوز14۔ستمبر۔2018ء) بھارت وچ اک مُنڈے نے اپنی گرل فرینڈ نال اجتماعی زیادتی ہون مگروں اپنی زندگی ختم کر لی۔ میڈیا رپورٹ وچ دسیا گیا اے کہ 19ورھیاں دے مُنڈے دی گرل فرینڈ نوں چھتیں گڑھ دے اک ضلعے وچ اجتماعی زیادتی دا نشانہ بنایا گیا۔ ایس حوالے نال پولیس سٹیشن وچ اک شکایت وی درج کروائی گئی، جیہدے مگروں پولیس نے اجتماعی زیادتی دے الزام وچ دو بندیاں نوں گرفتار کرن دا دعوا وی کیتا۔
ایس پی مائنک نے دسیا کہ کُڑی مُنڈا بازار توں واپس آ رہے سن کہ گھر دے تھوڑا نیڑے اپڑے تے سڑک اُتے کھلوتے دو منڈیاں نے اوہناں نوں گھمن دا طعنہ دتا تے جملے کسے۔ غصے وچ آ کے ملزماں نے کُڑی نال موجود 19ورھیاں دے مُنڈے نوں دھکا دتا تے اوہنوں تشدد دا نشانہ بنایا۔ جیویں ای مُنڈا بے ہوش ہویا تے دوویں ملزماں نے کُڑی نوں اجتماعی زیادتی دا نشانہ بنایا۔
ایس واقعے دے دو دن بعد مُنڈے نے خدکشی کر لی۔پولیس دا کہنا اے کہ مُنڈے نے ایہ کم ممکنہ طور اُتے شرمندگی تے پچھتاوے دی وجہ توں کیتا۔ کُڑی نے بدھ دے دیہاڑے پولیس سٹیشن جا کے اپنے نال ہون والے واقعے دی کہانی بیان کیتی۔ پولیس دا کہنا اے کہ 19ورھیاں دے مُنڈے دے رشتے داراں نے ویلے سر پولیس نوں اطلاع نہیں دتی تے مُنڈے دی لاش پکھے نال لٹکی برآمد کیتی گئی۔
