اوٹاوا(پاکستان پوائنٹ نیوز08۔ستمبر۔2018ء) نوبیل انعام جیتو پاکستانی ملالہ یوسف زئی نے کینیڈا دے وزیراعظم جسٹن ٹروڈو نال ملاقات کیتی،ملاقات دوران کُڑیاں دی تعلیم دے حوالے نال گل بات کیتی گئی۔ غیر ملکی خبررساں ادارے مطابق جسٹن ٹروڈو نے ایس ملاقات بارے ٹویٹر اُتے دسدے ہوئے لکھیا کہ اسیں جی 7دی صنفی مساوات مشاورتی کونسل دے حوالے نال گل بات کیتی تے ساڈا عزم اے کہ دنیا بھر دیاں زیادہ توں زیادہ سوانیاں تے کُڑیاں سکول جا سکن۔
دوجے پاسے ملالہ یوسف زئی نے نیک خاہشاں دا وکھالا کردے ہوئے کینیڈین وزیر اعظم جسٹن ٹروڈو دے ویلا دین تے ہر بال دی تعلیم لئی عہد کرن اُتے شکریہ ادا کیتا۔ یاد رہوے کہ ملالہ یوسف زئی دا تعلق پاکستان دے شہر سوات توں اے جیہنوں 2009وچ 12سال دی عمرے سکول توں واپسی اُتے دہشت گرداں نے گولیاں دا نشانہ بنایا سی، جیہدے مگروں ملالہ نوں علاج لئی لندن لیجایا گیا تے ہن اوہ اوتھے ای لندن دی آکسفورڈ یونیورسٹی توں اپنی پڑھائی مکمل کر رہی اے۔ایہدے نال نال ملالہ پاکستان سنے دنیا بھر وچ بالاں دی تعلیم تے سوانیاں دے حقاں لئی وی کم کررہی اے۔ملالہ نوں اپریل 2017 وچ کینیڈا دی اعزازی شہریت وی دتی گئی سی۔
