کولیشن سپورٹ فنڈ دی معطلی پاکستان نال سکیورٹی تعاون منسوخی دا حصہ اے:پینٹا گون

کولیشن سپورٹ فنڈ دی معطلی پاکستان نال سکیورٹی تعاون منسوخی دا حصہ اے:پینٹا گون

واشنگٹن(پاکستان پوائنٹ نیوز03۔ستمبر۔2018ء) ترجمان پینٹاگون نے آکھیا اے کہ پاکستان نال سکیورٹی تعاون دی معطلی دا اعلان جنوری 2018وچ کیتا گیا سی تے ایہدے وچ کولیشن سپورٹ فنڈ وی شامل اے۔ ترجمان پینٹا گون ولوں جاری بیان وچ آکھیا گیا کہ 30کروڑ ڈالر امداد منسوخی بارے اعلان نواں فیصلا یاں نواں اعلان نہیں، ایہ اعلان فنڈز دی نویں سرے توں ترتیب لئی مدت ایکسپائر ہون توں پہلے جولائی دی درخاست دی توثیق اے۔

ترجمان نے آکھیا کہ کولیشن سپورٹ فنڈ دی معطلی دی صورتحال برقرار اے۔ پاکستان نال سکیورٹی تعاون دی معطلی دا اعلان جنوری 2018وچ کیتا گیا سی، سکیورٹی تعاون منسوخی وچ کولیشن سپورٹ فنڈ وی شامل اے تے30 کروڑ ڈالر منسوخی دیاں خبراں وچ کئی شیواں نوں سیاق و سباق توں ہٹ کے پیش کیتا گیا۔ ترجمان نے آکھیا کہ امریکا جنوری توں پاکستانی فوجی حکام نال اعلا پدھر اُتے رابطے وچ اے۔

امریکا تے پاکستان سارے دہشت گرد گروپاں نوں ہران دے عزم اُتے قائم نیں۔ پاکستان تے امریکا افغانستان دا مستقبل پرامن ہون دا وژن رکھدے نیں۔ ترجمان پینٹا گون نے آکھیا کہ پاکستان اُتے حقانی گروپ سنے سارے دہشت گرد گروپاں خلاف بغیر فرق دے کارروائی کرن اُتے دباء پاندے رہواں گے۔ طالبان قیادت نوں مذاکرات دی میز اُتے لیان یاں گرفتار کر کے بے دخلی لئی وی پاکستان اُتے دباء پاندے رہواں گے۔