ریاض(پاکستان پوائنٹ نیوز25۔اگست۔2018ء) چالو ورھے حج دا اجتماع دو فلسطینی بھین بھراواں لئی مذہبی سعادت دے نال نال جذباتی ملاقات دا موجب وی بن گیا۔تفصیل مطابق موسی تے لطیفہ نوں خادم حرمین شریفین شاہ سلمان بن عبدالعزیز دے حج پروگرام دے تحت سدیا گیا سی۔ ایس حج پروگرام وچ سعودی فرمانروا اپنے خرچے اُتے دنیا بھر دے کئی ملکاں توں مسلماناں نوں حج لئی سددے نیں۔
لطیفہ نے اپنے بھرا نوں 14ورھیاں پچھوں ویکھیا تے اوہدے اتھرو نہ رُک سکے ۔ پچھلے 30ورھیاں دوران ایہ اوہناں دی دوجی ملاقات سی۔ لطیفہ مطابق اوہدا بھرا صرف دو سال دا سی جدوں اوہناں دا خاندان اج توں 30ورھے پہلاں لبنان ہجرت کر گیا جدکہ لطیفہ نوں اوہدے ماں پیو نے مصر گھل دتا۔ جیہدے مگروں دوناں بھین بھراواں دی صرف اک ملاقات 14ورھے پہلاں ہوئی۔
پر ایہ اک ملاقات اوہناں دے محبت نال بھرے رشتے لئی بُہتی نہیں سی۔شاہ سلمان دے حج پروگرام دے تحت موسی لبنان توں جدکہ اوہدی بھین لطیفہ مصر توں آئی۔ایس موقعے تے لطیفہ نے آکھیا کہ اج جدوں میں چودھاں ورھیاں پچھوں اپنے بھرا نال ملی تے اوہدے سارے وال چِٹے ہو گئے نیں۔ حالانکہ اوہدی عمر 32سال توں ودھ نہیں اے۔ میرا پُتر بسام وی اج جوان ہو گیا اے تے قدر وچ اپنے ماموں جِڈا اے۔ چیتے رہوے کہ چالو ورھے 5300حاجیاں نے شاہ سلمان دے ذاتی پروہنیاں دی حیثیت نال حج کیتا اے۔
