کینیڈا( پاکستان پوائنٹ نیوز27۔جون2018ء ) کینیڈین وزیر اعظم نوں تحفہ لینا مہنگا پے گیا۔ حکام ساہمنے تحفہ ظاہر نہ کرن اُتے جسٹن ٹروڈو نوں 100کینیڈین ڈالر جرمانہ کردتا گیا۔ قومی اخبار دی اک رپورٹ مطابق کینیڈا دے نوجوان وزیر اعظم جسٹن ٹروڈو نوں تحفہ لینا مہنگا پے گیا اے۔ جسٹن ٹروڈو نے سن گلاسز دا تحفہ حکام ساہمنے ظاہر نہیں کیتا ہویا سی۔ جیہدے اُتے کینڈین وزیر اعظم جسٹن ٹروڈو نوں جرمانہ کیتا گیا اے۔
جسٹن ٹرڈو نوں پچھلے سال کینیڈین صوبے پرنس ایڈورڈ آئی لینڈ دے سربراہ نے دومہنگے سن گلاسز دے تحفے دتے سن، جیہنوں ظاہر نہ کرن اُتے وزیر اعظم نوں 100ڈالر دا جرمانہ کرنا پیا اے۔ کینیڈین قانون مطابق ملکی وزیر اعظم نوں 200ڈالر توں و دھ مالیت دے تحفے نوں 30دناں اندر لازمی ڈکلیئر کرنا ہوندا اے۔ ٹروڈو دے پریس سیکرٹری مطابق انتظامیہ دی غلطی دی وجہ توں تحفے نوں ڈکلیئر نہیں کیتا جا سکیا۔
گلاسز دی قیمت 300تے 500ڈالر اے۔ چیتے رہوے کہ کینیڈین وزیر اعظم جسٹن ٹروڈونا صرف کینیڈا بلکہ پوری دنیا وچ خاص شہرت رکھدے نیں۔ کینیڈین وزیر اعظم جسٹن ٹروڈو نوں اوہناں دی شخصیت دی وجہ توں پوری دنیا وچ سلاہیا جاندا اے۔ جدکہ پاکستان وچ وی کینیڈین وزیر اعظم جسٹن ٹروڈو دے چاہن والیاں دی اک وڈی گنتی موجود اے ۔
