استنبول( پاکستان پوائنٹ نیوز25۔جون2018ء ) ترک صدر رجب طیب اردگان صدارتی الیکشن دے پہلے مرحلے وچ جت گئے۔ ترکی دے 2018دے الیکشن وچ چنگا ٹرن آؤٹ ویکھن نوں آیا۔ ترک صدر رجب طیب اردگان صدارتی الیکشن دے پہلے مرحلے وچ جت گئے نیں، اوہناں نوں 52فیصد ووٹ پئے۔ ترک صدر رجب طیب اردگان دی جت مگروں اوہناں دے حامیاں نے جت دا جشن وی منایا پر ترک لوکائی نے جت دا جشن بہت انوکھے انداز وچ منایا۔
ترک لوکائی نے امریکی ڈالر نوں پیرا ہیٹھاں دیند ے ہوئے اگ لا دتی۔ نویں چُنے گئے صدر رجب طیب اردگان نے الیکشن توں پہلاں ریلی نال خطاب کردے ہوئے آکھیا سی کہ ترک لوکائی ڈالر تے یورو نوں لیراکرنسی وچ تبدیل کروان تاں جے ترکی کرنسی مضبوط ہو سکے۔ ترک صدر رجب طیب اردگان دی جت مگروں ترک لوکائی نے اوہناں دی حمایت وچ ڈالر ساڑ دتے۔ ترکی کرنسی لیرا ڈالر دے مقابلے وچ 20فیصد ڈگ گئی سی۔
چیتے رہوے کہ طیب اردگان 2003وچ ترکی دے صدر بنے سن۔ رجیب طیب اردگان نوں 2016و چ ناکام فوجی بغاوت دا وی ساہمنا کرنا پیا۔ ترک لوکائی نے فوجی بغاوت نوں ناکام بنایا۔ ترک فوج دے اک باغی گروہ نے آرمی چیف نوں یرغمال بنا کے حکومت دا پاسا پلٹن دی کوشش کیتی سی جیہنوں ترک لوکائی، پولیس تے فوج نے ڈاڈھی طرحاں ناکام بنا دتا۔ ایس دوران ترکی وچ سینکڑیاں بندیاں دیاں جاناں گئیاں۔
