سعودی عرب وچ نکی عید کدوں ہوئے گی؟اعلان کر دتا گیا

منامہ( پاکستان پوائنٹ نیوز02۔جون2018ء ) سعودی عرب وچ نکی عید 15جون 2018 جمعے دے دیہاڑے ہون دی آس اے۔ ایس گل دا اظہار سعودی عرب تے کویت دے مشہور فلکیات دے ماہراں نے کیتا۔ سعودی عرب دی یونیورسٹی عون قاسم دے پروفیسر عبداللہ ال مِسند جوکہ فلکیاتی امور دے ماہر نیں، اوہناں دا کہنا سی کہ اسیں ایس گل دی آس کر رہے آں کہ ایس وار خلیجی ملکاں وچ رمضان المبارک دے روزیاں دی گنتی 29ہوئے گی ،ایس طرحاں آخری روزہ 14جون2018نوں ہوئے گا کیونکہ ایس تاریخ نوں شوال دی آمد دی خبر دین والا ہلال 43منٹ لئی ظاہر ہوئے گا۔

ایس گل دی تصدیق اک ہور فلکیات دے ماہر خلیل ال زاق نے وی کردے ہوئے آکھیا کہ ایس وار 30روزے نہیں ہون گے، ایس لئی عید جمعے نوں بندی اے۔ اک سعودی عرب نیوز ویب سائٹ اُتے مشہور فلکیات دے ماہر زیادال جاہنی دے چھپن والے بیان وچ، اوہناں نے آکھیا کہ اوہ فلکیاتی حساب نال ایس گل نوں چنگی طرحاں جاندے نیں کہ ایس وار 29روزے ہون گے تے مسلمان نِکی عید 15جون2018نوں منان گے۔

ایس بارے اوہناں دا ہور کہنا سی کہ اوہ ایہ گل 99.99فیصد یقین نال آکھ رہے نیں ایس لئی جیہڑے لوکاں نے شہر یا ملکوں باہر جان دا پروگرام بنایا اے اوہ 15جون 2018نوں نکی عید نوں نظر وچ رکھدے ہوئے اپنا سفری پروگرام ترتیب دین تے ہور تیاریاں وی ایسے حساب نال کر لین تاں جے اوہناں نوں کسے قسم دیاں اوکڑاں دا ساہمنا نہ کرنا پئے۔